鮮黃色門面晌依截大河道幾搶眼，因為左右兩邊唔喺五金鋪、跌打醫館，就喺啲噏噏耷耷嘅唐樓入口，唯一隔兩個鋪位嘅「拉麵台風」先又養眼啲。星期日嘅午市都頗多客人，坐到座無虛席，而店內呈長形，一室鮮色襯橙櫈、橙梳化，感覺幾醒目。不過，枱與枱之間拍得非常密，「條隙」基本上喺行唔到人，哈哈！而且啲枱都幾細張，作為café飲吓嘢就絕對無問題，如果食飯擺多一、兩碟嘢都唔太OK。
店內四周貼滿晒大大細細唔同飲食雜誌嘅報導，而最「突出」喺「飛雪礦物質水$4支（330ml）」嘅海報，無錯，店家喺無免費開水供應。
除一本散點餐牌外（有沙律、頭盤及小食、皇牌意粉、意大利飯系列、芝味系列（即焗意粉）），仲有一個午市「芝味焗飯推介」，以及「特價午市自選Pasta」。由於老婆話唔太餓，所以佢只喺點咗小食，而小弟則要咗一客自選意粉，亦因此，都要點支樽裝水俾佢。
散點餐牌
芝味焗飯推介
特價午市自選Pasta
煙肉焗薯皮 $28喺店方推介小食嚟，況且，老婆一向都鍾意食焗薯皮。一客有3件焗薯皮，薯仔掏空，留少少肉連皮，加入洋蔥同煙肉碎烤焗，再糝少少蕃茜碎及芝士粉。幾樣惹味嘢放埋一齊，幾難唔香口，不過，煙肉嘅處理較粗疏，切得頗大粒，此外，煙肉亦太肥，有時晌超市都會見到有啲較平價嘅煙肉，肥肉部份去到佔8乘，小弟如買煙肉就較喜歡奧運牌，唔貴之餘肥肉部份唔多。
晌門口個易拉架見佢寫明個「自選Pasta」只有星期一至五11:30-14:30供應，星期六、日及公眾假除外，都打定輸數點焗飯，但入到去坐落又有供應喎！自選粉意其實就即喺「車仔粉意」，由醬汁、蔬菜、配料、意粉都隨個人喜好挑選，收費方面1款為$34，2款為$38，3款則收$42，另外若揀大蝦或煙三文魚需另外補錢。
鮮雜菌煙三文魚尖通粉 $44（包餐飲）
小弟嘅自選意粉決定要鮮雜菌、煙三文魚，因為喺揀咗兩款材料，收$38，當中一款喺煙三文魚，額外補多$6。唔知喺咪慢工出細貨，一碟意粉都等咗幾耐，不過個尖通粉確實唔錯，尖通粉做得啱啱好，有咬口，揀嚟蒜蓉汁，幾重蒜香，仲感覺有啲似喺加咗金蒜粒；而鮮雜菌喺秀珍菇及雞脾菇，份量十足，不過煙三文魚就「騎尼」少少，原來就咁將啲冰凍嘅煙三文魚擺晌尖通粉上面，但估唔到份量就勁多囉。$44個餐晌荃灣區唔算平，不過隨著依區不斷「翻新」，唔少高檔住宅，新商場相繼進註、落成，只要食物做得好，都唔愁無客路。
意大利鮮奶咖啡
餐飲奉送基本即磨咖啡或茶，可升級要特飲，另加$6。小弟就要咗杯鮮奶咖啡Latte，好老實講，杯鮮奶咖啡絕對唔達標，撇除有無拉花依啲額外嘅視覺效果，個外觀望落已睇到啲奶泡好粗糙，有種好巖巉、好怪嘅感覺。入口味道唔單只咖啡味好薄，更加喺唔香、唔滑，都幾失望！
店方只有晚市收加一，而晚市以5:30pm後起計，如果想平平哋嚟試吓，佢哋都有下午茶提供（2:30pm-5:30pm），當中亦有意飯、焗飯類別。
雖然午市無收加一服務費，不過講到服務就一般般，唔太差亦唔叫好，侍應唔喺好太留意到店內情況，好似部份枱上嘅餐具籃喺真正嘅「無叉用」，要由客人多次揮手先注意到。同埋初時唔喺好識睇佢「自選Pasta」個計價，揀完鮮雜菌一款料收$34，另加煙三文魚咪諗住再加多$6囉，以為總共夾埋$40，個侍應妹妹又唔識解釋，淨喺話總之咁樣就收$44，問另一位男侍應又喺話唔知喎，佢話撳機喺咁計，卒之喺兩公婆自己一齊諗通嘅，真頂癮！
個人評分
味道：7/10
環境：7/10
服務：6/10
抵食：7/10
平均每人消費：HK$41
味道：7/10
環境：7/10
服務：6/10
抵食：7/10
平均每人消費：HK$41
餐廳資料：
意蠔屋 Pasta and Oyster House
荃灣大河道85號寶成樓地下9號舖
3689 5546
意蠔屋 Pasta and Oyster House
荃灣大河道85號寶成樓地下9號舖
3689 5546
沒有留言:
發佈留言