2013年4月9日星期二

Mint Thai House 薄荷葉泰國菜:烤肉泰滋味

以往參加一啲試食會,同枱多數都喺其他食家會員,遇上啲唔相熟嘅,又或未必咁投契嘅,話匣子自然需要啲時間嚟打開。不過,近來有啲試食活動,以現金劵輔助形式,讓食家自行定時間,又可以自行點菜,非常有彈性,最正喺可以約咩人都無限制嘛。既然今次有幸獲邀入到嚟元朗嘅「薄荷葉」試泰菜,自不然搵埋啲地膽帶帶路,唔使周圍悠悠轉。地膽喺邊位?咪家住天水圍嘅表姐一家囉,一講個名,表外甥就話知邊間,原來佢同細妹都喺晌「薄荷葉」隔離嘅新界鄉議局元朗區中學畢業,今次果然搵啱人。相約表外甥晌西鐵元朗站等,由佢帶小弟轉輕鐵,左穿右插話咁快就到咗「薄荷葉」,不費吹灰之力呀!
「薄荷葉」位處元朗安康路,距離西鐵朗屏站都幾遠,估計要行15-20分鐘。如果轉乘輕鐵可晌豐年路站落,穿過兩條街就喺,相對近啲,始終唔熟路都有少少難搵。由於「薄荷葉」周圍商鋪都喺啲車房、機器廠,好難此情此景會有咩泰國風情,不過,見店家都好有心去營造氣氛,門外欄杆圍上木棚架,又加添唔少熱帶植物,擺放幾枱半露天位,加上店舖面向嘅唔喺大街,所以入夜後好幽靜,感覺挺舒服。店內全放上原木木枱木櫈,有啲原始味道,一室綠色牆身,裝修簡約,店中央後牆位置架起100吋投射銀幕,不斷播放泰文歌,煞是有趣。有少部份木櫈喺無靠背,大家揀位時要留意一下。
翻一翻菜牌,都有非常多選擇,第一頁就喺叫Mint special order,顧名思義就知喺啲招牌嘢,如:穌梅鴨、泰式燒雞、泰式燒蠔……等,唔想諗太多大可晌度點三幾個作為主菜;其後嘅頭盤、沙律、湯品、蔬菜、飯麵、咖喱等,都喺大概$50-$70左右,唔算貴;喺海鮮會貴啲,百零到二百不等。店員話由泰藉大廚主理,保留著傳統泰菜味道,但又加咗啲新派元素,務求做到穩中求變;此外,仲提到店主晌新界自設菜園,所以店內香料同蔬菜日日新鮮供應,低碳兼新鮮!
bowl二人餐
點睇都喺實惠嘅選擇,有沙律(2揀1),有魚,有菜,有肉(2揀1)共4道菜,賣$288(+10%),比起4樣嘢散叫($352)慳兩乘架。另外再加多個烤肉同咖喱,已經好夠我哋4個人食。
bowl秘製青辣椒汁
未上食物,先嚟個醬料,自家製嘅泰式「青辣椒汁」,蘸烤肉就最好。雖然一向唔嗜辣,但點都試一試個味,咪睇佢一瞼「青BB」,辣得夠狠、夠勁。
bowl甜柚鮮蝦沙律(套餐菜式之一,散叫$68)
二人餐嘅沙律有兩款選擇:甜柚鮮蝦沙律或木瓜沙律,當然以前者吸引啲啦。成份有銀芽、紫洋蔥、紫椰菜、紅蘿蔔絲、泰國金柚、車厘茄、凍蝦,雖然凍蝦未見好爽口,而製法亦無乜花巧,不過就勝在用料新鮮,柚肉清甜多汁,銀芽洋蔥等爽口咬落索索聲;沙律本身已帶有微酸,再撈勻周邊啲醬汁,酸辣醒胃。
bowl馬拉盞炒通菜(套餐菜式之一,散叫$48)
炒時菜指定咗喺炒通菜,可以揀就一喺馬拉盞炒,一喺鹹魚炒,兩者我都無所謂,都喺鹹香掛帥,由表姐發辦。當送上嚟時,真喺一朕朕蝦醬鹹香味,奇怪食落又唔喺咁出咋啵,幸好通菜都靚、唔老,食落唔會一口渣。
bowl泰式燒羊架(套餐菜式之一,散叫$98)
烤肉有燒羊架或燒豬脾仔供選擇,表外甥女鍾意羊架,表外甥鍾意豬脾仔,所以套餐要咗燒羊架,另外再額外再點多一客燒豬脾仔。羊架燒得唔錯,一客4件啱啱好夠分,外層焦香,肉嫩多汁,比期望中少羶,羊架應預先醃過,因為食到有啲沙嗲香,醮點青辣椒汁極刺激。咪錯過墊底嘅沙律菜,仲加咗菠蘿粒粒、紫椰菜、紅蘿蔔絲,份量要比坊間作伴碟嘅多,而且鮮甜清爽,果然有自家菜園喺有點優勢呀。
bowl泰式檸檬魚(套餐菜式之一,散叫$138)
原本個套餐喺指定有一客「泰式椒鹽魔鬼魚」,不過店員話今日無魔鬼魚,改咗「泰式檸檬魚」,似乎感覺有啲可惜,幸好個檸檬魚又幾得,總算無失望而回。元朗烏頭、兩側嘅沙律菜、頭尾兩堆雜菜絲及清新薄荷葉,放晒晌成呎半長嘅大碟之內,很有睇頭,賣相亦好唔錯。酸味來自烏頭上嘅青檸檬,好鮮活,餐牌已註明兩隻辣椒度,確實又幾辣吓,如果唔食得辣或有小朋友,請預先要求少辣,或索性走辣,不過無咗辣味,又好似少咗種風味。雖然烏頭唔喺好大條,但鮮味十足,煎得恰到好處,肉質嫩滑,有水準喎,怪不得都見幾多人有叫此菜式!
bowl黃咖喱雞 $58
黃咖喱可配豬 / 牛 / 雞,因為已經有羊有豬,所以黃咖哩配雞,已問過雞件喺雪藏貨色,但出奇地又無乜雪味喎,兼且唔嚡添。餐牌話黃咖喱喺一隻辣椒度,但我哋幾個異口同聲話喺零辣度,事後有向店員反應,佢話可以加辣嘅。不過問題喺檸檬魚有兩隻辣椒度,好辣,而黃咖喱一隻辣椒度,卻喺唔辣,個標準比較飄忽咁囉。再者咖喱亦未喺好香濃,味道未夠突出,欠個性,質感較杰身,但賣相就有心思喇。
bowl薄餅 $42.白飯 $10
點咗個黃咖喱,唔叫個薄餅同白飯嚟點汁食,好似好嘥囉。薄餅單售唔平,不過一客有4件之多,摺起嚟個賣相幾有趣,而且又見株薄荷葉出場做裝飾,唔知大家有無留意,佢哋好多菜式都梗加株薄荷葉,大概想貫徹番店家嘅名字啩。薄餅烤得幾酥香,口感煙韌,如果上枱時夠熱辣,相信口感更好。白飯原應都無乜好講,約略一提,就喺佢夠晒大碗,大到有兜黃咖喱咁多,老套啲賣句廣告,泰國香米,香軟有飯味,哈哈。
bowl泰式燒豬脾仔 $98
跟羊架一樣,一客4件,仲跟埋4把鋸扒刀,小弟認為多此一舉,因為豬脾仔以錫紙條打咗個小結,一來做個小裝飾,二來可利用作為包住豬脾仔條骨直接拎嚟食,當然以手揸住嚟食最有風味,大大啖喺咁扯,食得夠豪爽。味道又如何?豬脾仔燒得甘香,有肉地且鬆軟,淋上嘅泰式酸辣醬,倍添惹味,值得推介。
整體而言,菜式選擇多,價位唔高,用料又幾新鮮,尤其肉類及魚類頗出色,只喺個咖喱未符期望,有待改善。雖然喺試食邀請,但都俾番個參考大家,一共$550埋單,除勻每人大概都喺$140左右。表姐一家食得幾滿意,我都放心啲,仲話下次可以叫埋今晚因工無嚟嘅表姐夫試吓添,食完又有佢哋送我去西鐵站,唔使我「盲騾騾」搵路走!

個人評分
味道:8/10
環境:8/10
服務:8/10
抵食:9/10
平均每人消費:HK$140

餐廳資料:
Mint Thai House 薄荷葉泰國菜
元朗安康路2號怡康大廈地下12-13號舖
2475 5872

沒有留言:

發佈留言