2013年4月24日星期三

逸亭餐廳 The Gazebo Restaurant:真想逸逸食唔停

跟幾個朋友嘅飯聚,想食自助餐,又唔想花得太多,六國酒店嘅Le Menu絕對食得過,不過,另一選擇亦可揀利景酒店嘅逸亭餐廳,都喺屬於市區少有仲喺賣緊$300樓下就有交易嘅自助晚餐。逸亭都唔喺第一次幫襯,不過對上一次原來已經喺2007年年尾嘅事,有食評為証,睇番啲相,環境好似無乜點變,所以食物嘅量同款都相差無幾,但喺就無咗以前嘅Spinning Salad喇!
雖然依期餐廳嘅自助餐主題叫「春日自助餐」,但似乎都喺個虛銜,然而食物方面都喺大包圍,樣樣有啲,基本如沙律、海鮮、冷盤、餐湯麵包、熱盤、魚生壽司、烤肉、粉麵檔、甜品、自助飲品吧……等等,叫做「麻雀雖小,五臟俱全」。之不過亦有佢賣點,例如:芝士盤、海南雞飯、粉麵、即做窩夫、班戟,都唔好錯過。
bowl沙律
雖然無再搞Spinning Salad,但沙律吧一樣有睇頭。3大盤沙律菜,當中共有4、5款蔬菜,而側旁仲有9款蔬菜類配料,如翡翠苗、三色燈籠椒、紅菜頭……等,加埋7款佐味配料(煙肉碎、橄欖、芝士粉……),一定撈出自家心水沙律。千祈唔好忘記加醬汁,4款醬汁分別喺芝士沙律汁、油醋汁、千島汁及蜜糖芥末汁,後者最得我歡心。
唔想煩自己搞都有計嘅,晌冷盤嗰邊都有幾款調製好嘅沙律:泰式牛肉沙律、薯仔沙律、螺絲粉沙律。以泰式牛肉沙律較特別,故都夾多少少。
整體味道唔錯,沙律吧啲料夠新鮮,全部冰鎮住,感覺冰涼清爽。而泰式牛肉沙律確喺幾有趣,鹹鹹辣辣,別有點泰式風味。

bowl海鮮
三百零蚊嘅自助晚餐期望有新鮮生蠔供應,似乎不切實際。但海鮮陣容都唔差,有蜆、長蟹腳、瀨尿蝦、藍青口、八爪魚、甜蝦、紐西蘭青口,每次出少少,去貨快,但補貨都OK,甚少有缺貨情況。當中蟹腳稍為鹹,而藍青口、甜蝦最好食,其他嘅屬不過不失。
bowl冷盤
今次冷盤就襯埋沙律一齊食,因為見有幾款凍魚及凍肉腸,可能會稍鹹,故夾沙律就可以平衡一下。凍魚要齊煙三文及膠魚,另一邊拼盤中有好多選擇,揀咗沙樂美腸、燒牛肉及一款肉卷,令到我份沙律極之豐富。此外,冷盤仲有啲日本綠茶冷麵、日式八爪魚、芝麻海帶、螺肉……等幾款日式食品。
bowl芝士盤
近年好多自助餐都有提供芝士盤,不過都喺兩三款應吓場。但估唔到晌度嘅芝士盤竟然有成5款之多,分別喺法國嘅Sainte-Maure、Camembert、Brie,荷蘭嘅Edam,以及丹麥嘅Danish Blue,其實小弟對芝士唔喺咁叻,餐廳印備咗芝士名稱,我都只喺照字搬字俾大家知道吓佢哋個名。不過,慢慢細嚐,質感、味道又各有分別,淨食確喺幾有趣,如怕芝士朕濃味,配克力架或麵包都可以。
bowl餐湯.麵包
是日餐湯喺栗米忌廉湯及節瓜湯,水準普通,而餐湯後方放有麵包籃,有數款歐陸小圓包及麵包條,都幾唔錯,如果喺暖烘烘就仲正。
bowl熱盤
場地所限,熱盤可謂一眼睇晒,一共有12樣嘢,概略為大家介紹下:古法薑醋豬手、蒲燒茄子、炒雜菌時蔬、忌廉汁焗青口、燒三文魚頭、燒羊架、椒鹽炒大蝦、粉米粉、清蒸海鱸魚、炆牛筋、炒飯、馬來咖喱燒鴨,整晚都無乜轉款,來來去去都喺食十多樣。期間曾見過有出芝士焗蠔,不過好快就無晒,亦唔見有返貨,好可惜!熱盤一環,感覺上款式相對弱啲,不過,蒲燒茄子、椒鹽炒大蝦、清蒸海鱸魚、炆牛筋及馬來咖喱燒鴨都做得不俗,尤其炒大蝦幾厚肉,蒸鱸魚好鮮甜,炆牛筋勁腍,而馬來咖喱頗芳香。粉米粉、炒飯就唔沾手喇,留肚食甜品吖嘛。
bowl魚生.壽司
有吞拿魚、三文魚、油甘魚、八爪魚等4款大路魚生供應,而壽司及壽司卷夾埋亦有6、7款,雖然睇落都唔差,不過,今晚對魚生壽司真喺興趣唔大,所以就無幫襯,俾唔到味道、質素嘅評語喇。
bowl即煮粉麵檔
平時去食自助餐真喺好少食粉麵,太易飽肚喇,不過依度嘅粉麵檔又幾有賣點,除咗一入門口就喺成個大牌檔之外,麵條之選擇喺少有嘅咁多,甘筍麵、菠菜麵、上海麵、油麵、河粉、米粉、粗麵、銀針粉,單點、兩溝都得;而餸料亦唔少,魚皮餃、鯇魚片、鮮蝦、魷魚、豬腩肉……共12款,連蔬菜一樣提供多款選擇,如生菜、菜芯、銀芽、木耳、翠玉瓜……近10樣。「求其」樣樣點啲都可能成一大碗,所以我哋就點一碗嚟幾個人分享,志在試一試。甘筍麵搭菠菜麵,雖然味道唔喺好突出,勝在喺健康之選,湯底有喇沙湯同牛肉湯,放麵嘅喺喇沙湯,都OK喎,入口辣香;另外叫師傅俾一小碗牛肉湯,肉味幾濃,但淨飲會稍鹹,撈埋啲粉麵可能會正常啲。至於其他餸料,屬平穩,始終都喺啲大路貨色。
粉麵檔「鋪位」仲提供埋海南雞飯,又喺值得一試,同樣,我哋幾個要一碟嚟分享。雞油飯做得幾香、幾油潤,而雞肉挺嫩滑,幾有鮮雞味。海南雞飯必備嘅甜醬油、薑蓉、辣椒醬都一樣預備好,悉隨尊便。
檔口前仲有啲以鐵板盛載嘅小食,如煎蘿蔔糕、生煎包、牛仔腸、煎餃,但感覺好似攤涼晒,唔喺好有吸引力,無試到。繼要梗喺轉戰甜品。
bowl甜品
亮點絕對喺4款Dreyer’s雪糕,窩夫機同迷係班戟機。依晚嘅Dreyer’s雪糕有曲奇妙趣、杏仁、芒果鮮果及雲呢拿,所以先嚟一個DIY甜品拼盤:新鮮窩夫配曲奇妙趣、杏仁、芒果鮮果雪糕伴蜜糖朱古力漿,再加埋班蘭蛋糕、年輪蛋糕及芒果布甸、紅莓奶凍、德國芝士餅,幾咁豐富嘅甜品拼盤呀!因為樣樣都喺心水,所以特別滋味,正。
除此以外,甜品都仲有好多的的骰骰嘅款式,如桂花糕、草餅、蛋白球、忌廉蛋糕、蛋撻仔、麵包布甸……等等,擺設得幾靚,而熱食嘅蛋撻仔、麵包布甸之類又放晌暖櫃烘住。不過綜合大家嘅意見,似乎味道唔喺太出眾。
見佢仲有個木桶豆腐花,有感好耐無食過,就臨尾再戰多碗豆腐花先,不過唔甘心就咁食就算,所以加啲生果變成為鮮雜果豆腐花,理應會幾好食,不過豆花尚暖,入口感覺怪怪,應該一早攤定一碗豆花先,哈哈。題外話,熱食豆腐花你諗到仲可以撈咩好?其實仲可以加落啲清湯麵度,放點辣油同肉碎,我晌貴州出差街邊就有好多小鋪賣豆花麵架喇。
bowl自助飲品吧
有可口可樂、雪碧,不過唔喺支裝又唔喺罐裝,你當佢喺大樽裝,飲幾多斟幾多,前段小弟就加片檸檬變檸樂,邊飲邊食。另外咖啡、紅茶隨你揀,臨尾配甜品,總喺嘆杯即磨咖啡先夠爽。
幾個朋友成晚唔停咁食,又傾過不停,時間過得快。做人嘅嘢,真喺好想閒閒逸逸,好嘢食唔停!

題外話:
春日自助餐嘅收費如下:星期一至四,成人收$318,小童/長者收$248;星期五至日、公眾假期及前夕,成人收$338,小童/長者收$268。匯豐、恆生、Citibank有8折,當然唔及Openrice優惠券有7折啦,折咗貴極都唔過三百,以上述食物嘅種類同款式,同屋企或朋友嘆番餐,都幾唔錯!食自助餐勝在隨大家鍾意食乜就揀乜,唔使擔心人哋嘅口味,又可以想食幾多就幾多,唔使擔心叫得少試唔到,叫得多又食唔晒!

臨走仲拎晒張自助餐單張,原來餐廳晌星期六、日嘅「自助午餐」仲搞咗個小童cupcakes創作班,凡惠顧自助午餐嘅小朋友就可以免費參加,親自設計兩款可愛又獨一無二嘅杯子蛋糕,親子好節目。而自助午餐收費如下:星期一至六,成人收$198,小童/長者收$168;星期日及公眾假期,成人收$228,小童/長者收$198。

個人評分
味道:7/10
環境:7/10
服務:6/10
抵食:8/10
平均每人消費:HK$290

餐廳資料:
逸亭餐廳 The Gazebo Restaurant
灣仔灣仔道209-219號銅鑼灣利景酒店1樓
2892 3388

沒有留言:

發佈留言