Eden Rose Restaurant：新推午餐更親民

好耐之前曾經從雜誌睇過有關Eden Rose嘅報導，早之聽食友到過Eden Rose試菜，大讚用料高檔，菜式有水準，可以講得喺平價嘆高檔歐陸菜，價位大概比坊間平3乘左右，值得一試。咁氣氛浪漫，高質食店，打算留番啲特別日子先嚟，所以慢慢無咗回事。店家開業初期只做晚市，仲喺得套餐供應，穩定後再加入散點餐牌；最近偶然經過附近，見佢有派傳單，原來依家推出咗午餐，細看之下跟同區有質素嘅西餐廳差唔多，但比佢嘅晚市定價平咗幾截，實在喺個大喜訊，急急腳拉埋老友Ivan兄一齊嚟試吓。

散點餐牌，分類為前菜、湯、主菜、意大利飯 / 意粉

雖然店家為樓上鋪，但所在地點超方便，晌銅鑼灣B出口一出轉左行幾步就喺。晌餐廳門口，貼有好幾張雜誌嘅餐廳專訪，標題都喺「親民的價錢　五星級的享受」、「上樓食水準歐陸菜」、「親民Fine Dining」……等等。一踏入店內，雖然環境細細，但只擺約30開來個位，唔會太逼，而且，閃令令水晶吊燈、棗紅紅絲絨梳化、黑漆漆實木木枱嘅組合，高貴優雅，甚有浪漫元素嘅紅黑配襯，晚上嚟用膳一定好有情調。不過，此時此刻，日光之下又另一番景象。最正靠窗嘅一排座位，一來喺前後背靠，唔會產生太大騷擾，二來喺偌大嘅玻璃窗外，景觀喺對住成幢希慎及附近一帶街景，感覺好唔錯，如果喺夜景，相信都幾璀璨迷人。

餐廳門口所貼出嘅雜誌專訪

午餐以兩道菜為本，包沙律或餐湯，A-F共6款主菜可供選擇（$68-$98），奉送冷熱飲品，另外可加$20享用是日甜品，咁好環境，咁好招呼，仲要免加一，真喺抵食得無話可說。

蒜蓉包．蕃茄莎莎
餐包喺小弟其中一款頗鍾意嘅麵包：意大利香草包（Focaccia），鹹鹹香香好鬆軟，但依個仲要喺升級版，加咗蒜蓉再焗，香味倍增，真喺有啲想問可唔可以添食嘅衝動。以蕃茄粒、洋蔥粒、香草及橄欖油所做嘅蕃茄莎莎，雖然刴得唔喺好細碎，但酸香鮮活，食後令人感覺好清爽。

 香草香蒜包 + 蕃茄莎莎 = 正！

乾蕃茄沙律
意想不到三大驚喜嘅前菜，紫椰菜、九芽生菜、羅馬生菜作為沙律底，配少少果仁碎，出面一般加幾粒開半嘅車厘茄點綴吓就算，但眼前沙律嘅驚喜一喺加咗幾片意大行乾蕃茄，油潤煙韌更濃蕃茄味；驚喜二喺醋汁用上10年陳嘅黑醋，跟晚上做菜用料一樣，味道好醇厚；事後有機會跟大廚交流，先知醋汁事先再輕輕煮過，讓味道更濃香，呢個就喺驚喜三！

什菜餐湯
裝餐湯個瓷碗好別緻，圓圓彎彎。個什菜餐湯相對無個沙律咁多驚喜，之不過仍然好有水準，味道酸酸甜，好濃郁，頗醒胃嘅餐湯。

主菜一共有6款，有特色沙律、意粉、意大利飯、烤豬肋骨、漢堡、肉眼扒。其實有好幾款都想試，總之就拉多幾個人一齊嚟，唔使度得咁辛苦。

燒牛舌茄茸意粉（午餐價$72）
我同Ivan兄咁啱對牛脷都有少少情有獨鍾，所以揀此意粉，結果都無令我哋失望。牛脷厚切成粒粒，大概有8-9粒左右，所以非常多料，最正喺大廚不厭其煩將每粒牛脷粒都6面煎香，入口外面焦脆，內裡軟腍，配合埋牛脷獨有嘅味道，真喺好滿意。而意粉帶有濃郁茄香，又均勻，加咗少少新鮮香草碎作為提味，拌有白菌片同乾蕃茄，可以咁講，無燒牛脷淨食個意粉都稱心呀。

紐西蘭肉眼扒（6安士）配牛油雜菜（午餐價$98）
晚市散叫有個燒紐西蘭肉眼扒（10安士），賣$208，依家雖則得6安士，但包沙律或餐湯，仲有餐飲，卻喺一半價錢都唔止，實在更親民。肉眼要咗五分熟（medium），其實講開幾多成熟，似乎都無一套絕對標準，又要視乎師傅手勢，食嘅人又有啲主觀意願，總之眼前五分熟嘅肉眼就對上小弟自己嘅口味，表層微焦，內裡粉嫩，口感油香嫩滑，肉味挺濃又富肉汁，紐西蘭肉眼扒嘅質素一啲都唔失禮，唯獨個黑椒汁辣得嚟有點嗆。雖然薯菜都被認定喺配角，不過都有出色與失敗之分。薯角連皮新鮮炸，入口熱呼呼，又脆又薯味足，而西蘭花、椰菜花、甘筍條以牛油及洋蔥炒過，味道唔單一，就算未能成為最佳配角，都會喺出色嘅演繹。大廚仲話，作為配菜嘅薯仔仲會玩變種，有時喺薯片，有時喺薯絲添。

題外話一講，載住主菜嘅碟，都喺預熱晒，令到啲餸菜唔會咁快攤涼，足見店家晌細節位都做足功夫。

散點餐牌中，有4款甜品供應，賣$48嘅檸檬雪葩、焦糖燉蛋、草莓吉士千層酥，以及賣$68嘅朱古力芭菲。午餐加$20就有一款指定甜品，侍應話成個星期都喺同一款指定甜品，每星期轉款，仲補充話跟晚市散叫嘅分量、水準一樣，咁吸引又點可以錯過呀！

焦糖燉蛋（午餐+$20）
焦糖燉蛋就喺是日甜品，外觀對辦，燉蛋部份幾滑幾香蛋味，焦糖面面做得都脆，只喺個人覺得厚咗啲。雖然只喺小小一兜焦糖燉蛋，但仍然加啲士多啤梨及果漿，增添整體賣相美感。

草莓吉士千層酥（午餐+$20）
本來甜品只得焦糖燉蛋，可能個經理見我哋對只得一款甜品有啲失望，經理話跟大廚商量一下，結果唔介意將下星期應付午市所出嘅草莓吉士千層酥都整一份俾我哋試，實在好感謝。無論賣相、味道，依廿蚊絕對抵到不得了，首先講賣相，又唧糖漿，又灑糖霜，切埋士多啤梨薄片，幾有心機；論到味道，個千層酥最特別喺個酥皮，有別一般傳統做拿破崙所用嘅千層酥皮（puff pastry）嚟做，用上更薄身、更少牛油嘅酥皮，有啲似紙酥皮（filo pastry或叫「飛佬皮」），按所需大細獨立捲起一件件嚟焗（千層酥皮則一大整塊咁焗，焗完先裁番所需大細），所以酥皮色澤偏白，唔會太重牛油味，味道較清，但鬆脆度比千層酥皮過之而無不及。吉士自家以雞蛋打，所以蛋味夠香，而且質感非常柔滑，又少甜，確喺一件相當清怡嘅甜品。

意大利鮮奶咖啡
甜品總要襯杯咖啡先夠賞心樂事，Ivan兄嘅意大利泡沫咖啡唔知味道如何，不過，小弟就好滿意手中嘅鮮奶咖啡，心形嘅拉花拉得好靚、好自然，為求質素，店家沖咖啡當然用上即磨咖啡豆，所以咖啡很醇香，豐厚嘅奶泡帶嚟很細滑嘅口感，真喺令今餐「晏仔」有個完美作結。

由於午餐新推出無耐，加上假日，客人唔多，所以餐後大廚走咗出嚟問吓我哋意見，我哋又鍾意煮吓嘢，所以交流唔少，應該話學嘢唔少。午餐嘅食材跟晚市用料一樣，雖然午餐只焗限於得6個選擇，甜品又有限定，但消費可能只相當於晚市嘅1/3或1/2。再者環境一流，感覺舒服，而侍應態度親切，服務甚到位，每道菜都會等客人一道食完先上另一道，唔會堆到一枱都喺，令人食得悠然，上菜時又提醒食客，餐碟挺熱要小心。晌度就咁飲一杯咖啡，都要三十零蚊啦，所以你話佢個午餐喺咪賣大包，抵食到震。

個人評分
味道：9/10
環境：9/10
服務：9/10
抵食：10/10
平均每人消費：HK$105

餐廳資料：
Eden Rose Restaurant
銅鑼灣軒尼斯道499號永光商業大廈19樓
2836 6880