吉豚屋吉列豬扒專門店 Ca-Tu-Ya：價廉物美吉列盛．讚

壽司、拉麵以外，吉列應該都算喺晌香港開到成行成市嘅和食專門店，城中出名嘅吉列專門店都有唔少，例如：丼吉、銀座梅林、勝博殿……等等，不過都喺啲高價位食店，食一餐人均花費近二百元，質素卻有一定保證；但近幾年亦多咗啲親民價位嘅吉列專門店，質素亦都唔差，今晚跟幾位食友同行，所試嘅「吉豚屋」就喺其中之一。佢晌日本有成二百多間分店，卒之晌舊年年底嚟香港插旗，由於店方打正旗號以價平質高作招徠，加以連鎖式經營，做到價廉物美，所以，自不然成為一眾想慳啲嘅追捧熱點。

既然稱為吉列專門店，所謂皇牌美食當然全部都喺吉列嘢啦，為此小弟都打定底，出發前先自灌兩杯涼茶，哈哈！吉豚屋面門唔差，仿瓦片簷篷，木板牆身，一段介紹店舖歷史嘅日文，模仿老店色彩。一入門口就喺開放式廚房，廚房前亦有一排吧枱位，完全唔怕你睇住佢哋嘅製作過程，確實第一眼俾人印象整潔企理。再入去餐廳分咗上、下兩層，多數都喺啲二人或四人位，但人多可安排拍枱，而裝修簡約，枱櫈拍得又唔算逼，空間感算唔錯。最鍾意喺佢近門口有張長椅，喺俾人等外賣時坐，如果佢哋想賺盡啲，真喺可以加多兩張枱晌處。

等外賣嘅長梳化椅 

 一段介紹店舖歷史嘅日文

翻開餐牌，因為全部都喺吉列菜式，可能有個錯覺，好似嚟嚟去去都喺嗰幾樣嘢，稍不留神以為無咩分別，所以都嘥少少位歸納一下，希望大家了解多啲。基本上分為丼（或碟頭）同定食，前者即喺得飯，款式有滑蛋吉列豬扒、和風汁吉列豬扒、吉列咖喱豬扒，而且以梅（80g）、竹（120g，翻睇其他食友嘅食評，以前竹嘅份量喺110g，竟然依家價錢無變，變嘅喺更加抵食）、松（80g x 2）3個豬扒分量嚟定價，滿足不同食客需要，仲有就喺可以+$9配細嘅野菜豚肉湯，+$15配碗大嘅，變相成為定食；後者（定食）就飯連野菜豚肉湯（小），款式有基本嘅吉列豬扒、吉列豬柳或雙拼，無梅竹松唔同分量之分，但+$5可轉大湯，不過更有趣喺，定食又可減$20變番單點項目，即喺淨餸，其實搞嚟搞去都有啲複雜，可以嘅話不如全部改為單點項目，配飯、配湯、配嘢飲要加幾多仲好。

此外，以及後期新加推嘅雞扒同炸蝦菜式，同樣分滑蛋吉列、和風汁吉列、吉列咖喱、吉列定食，一樣無梅竹松之分，不過，炸蝦卻喺可以拼豬扒或豬柳喎。另外，+$9可以加飯，椰菜絲就無免費添加，單點要收$9碟，以上全部無論丼或定食，+$6配嘢飲一杯，有咖啡、奶茶、檸茶、巨峰乳酸特飲、可樂、雪碧等選擇，使多使少完全等人有得走趲。

巨峰乳酸特飲 +$6
咖啡奶茶汽水都無咩特別，所以對個巨峰乳酸較好奇，一身粉紫造型，飲落甜甜酸酸，叫做幾得意咁啦。

野菜豚肉湯（小）
都幾多料喎，有美國豚肉、紅蘿蔔、白蘿蔔，後加大蔥。而湯底以白麵豉搭赤麵豉做成，所以色澤相對淡色少少，但味道清甜，唔錯！

滑蛋吉列豬扒飯 $45
上文講過有分梅、竹、松嘅分量，售價則為$45、$59、$79。餐牌就喺以此飯為封面，可見喺店方嘅推介之作，雞蛋以熱辣嘅吉列豬扒餘溫熱熟，帶著蛋汁拌飯就最正，加上飯粒圓潤又飽滿。豬扒用上美國貨式，都以日本秘方調味過，食起嚟入味鬆軟。

吉列豬扒定食 $65
依個定食中嘅吉列豬扒有120g重，而仲有一款叫雙層吉列豬扒定食（$89），顧名思義，就喺兩枚吉列豬扒（80g）。賣相有板有眼，細心留意會發覺豬扒表面嘅麵包糠比一般常見嘅會粗身啲，據公關講，咁樣會減少麵包糠嘅吸油度，確實咬一口吉列豬扒，又真喺無乜油喎，感覺又脆又爽；而豬扒肉汁唔算澎湃，但鬆軟無疑。配上爽口嘅椰菜絲，始終喺出色嘅配搭。

吉列豬柳定食 $75
一客有成3件豬柳，對比起豬扒，豬柳嘅質感較實淨，不過肉味稍濃，外層依然甘香鬆脆，證明炸功水準穩定。淋上豬扒汁，更好食，因為豬扒汁酸酸哋，更去油膩感，感覺更醒胃。枱上仲放有幾款醬料：芝麻醬、黃芥辣、七味粉，點運用悉隨尊便，值得一提喺豬扒汁及芝麻醬喺自家中央製作，晌邊間店食到嘅都喺一樣，芝麻醬亦都做得出色，醮豬柳都正。

吉列炸蝦定食 $69
跟炸蝦定食仲有一小兜秘製沙律醬及檸檬件，可令炸蝦食落更清新，再者，一客有5條炸蝦，又大又長，蝦肉頗鮮甜，認真抵食。

吉列炸蝦豬扒定食 $69
又想食炸蝦，又想食豬扒，可以點算？吉豚屋為顧及多心人士，吉列炸蝦可以拼豬扒或豬柳，都喺賣$69一客定食，前者2條炸蝦夾一件80g吉列豬扒，後者則2條炸蝦拼2件吉列豬柳。

除咗新推出嘅炸蝦，雞扒亦喺另一新出品，公關亦都非常細心，上面試咗豬扒、豬柳、炸蝦，食法有淨吉列、配滑蛋，下面再試兩款雞扒料理，一款襯和風汁，另一款襯咖喱汁，咁就基本上可以話試勻所有嘢。但最可惜嘅喺，餐牌上仲有一款吉列免治豬肉定食（$65），貼住「coming soon」，如果試埋就真喺齊葺葺喇！

和風汁吉列雞扒飯 $39
塊吉列雞扒好大件，扲晒成個碗面咁滯，切好晒一小一小件，方便食用，下面又墊有好多椰菜絲。雞扒厚身但挺嫩滑，而和風汁稍甜，且果味重，都頗有特色。唔鍾意滑蛋，又唔食辣嘅另一選擇。唯一要抽掅吓嘅，就喺和風汁太少，相信可以要求多汁嘅。

吉列咖喱雞扒飯 $49
咖喱汁又如何？比常遇到嘅日式咖喱屬少甜版本，不過有啲辛口，即喺帶微辣，質感濃稠適中，咖喱撈飯，永遠一流，無餸都可以食成碗飯啦！

試咗多款炸物，感覺吉豚屋嘅出品夠專注，質素唔錯，份量又夠大，勝在平吖嘛。所以，唔喺追求高質素、高享受之人，吉豚屋價位咁親民，實在非常有吸引力。

在收銀處已貼有通知，香港第2分店將於5月晌旺角開業，而香港第3分店亦相繼於將軍澳新都城登陸。如閣下有興趣關注此店，可上佢哋臉書版面留意最新動態。晌度再次多謝食友嘅邀請及公關嘅款待，讓小弟享受依餐吉列盛饌，讚呀！

個人評分
味道：8/10
環境：7/10
服務：8/10
抵食：9/10
平均每人消費：HK$70（試食邀請）

餐廳資料：
吉豚屋吉列豬扒專門店 Ca-Tu-Ya
九龍灣牛頭角道77號淘大商場三期地下G286-288號舖
2351 1899