2013年4月19日星期五

東海堂 Arome Bakery:撻出愛火花

由於唔再使星期六返工,有段時間同老婆經常晌美孚區食下午茶,仲以「我的美孚下午茶餐」為題寫咗一系列食評。東海堂都寫過一次,但又唔使要食下午茶先嚟買餅嘅,見老婆近日晚晚加班,所以就買兩件甜點當宵夜,精神上支持吓佢。可能真喺對東海堂有啲偏心,其實港鐵美孚站(荃灣線)有東海堂,亦有美心,佢哋份屬同集團,不過就真喺鍾意幫襯東海堂多過美心。
晌東海堂店前註足咗一陣,見「多彩な吉士撻」系列最吸引,草莓吉士撻、芒果吉士撻、栗子吉士撻、鮮果吉士撻、藍莓吉士撻、白桃吉士撻共6款,當然款款都想試啦,不過作為「宵夜」,兩個就夠晒數。
 一系列嘅「多彩な吉士撻」
bowl栗子吉士撻 $18
栗子向來都喺老婆至愛,所以栗子吉士撻喺鐵膽之選。吉士撻放晌雪櫃多雪咗幾個鐘,個牛油撻底咬落都仍然非常鬆脆,撻殼之上有一層朱古力漿及海綿蛋糕,有啲人以為喺想好味啲,層次豐富啲,其實學過整果撻嘅人都知,啲朱古力漿喺用嚟「防濕」,隔絕水份滲落個撻殼變腍,尤其果撻滲水機會特別大,而再整多層海綿蛋糕可謂雙重保險;跟住再上喺北海道3.6牛乳吉士忌廉,比一舨忌廉更重奶味,質感十分柔滑;最面就仲有栗子粒,同超多嘅栗子蓉,以及裝飾同味道兼備嘅原粒栗子(半粒),令整件栗子吉士撻非常有睇頭,而栗子蓉軟綿富栗子香,少甜版更易為人受落,原粒栗子亦粉腍清甜,實在好食!
櫥窗內嘅栗子吉士撻
 bowl白桃吉士撻 $18
所有吉士撻都喺以香脆牛油撻底、朱古力漿配海綿蛋糕為基礎組合,繼而先有日本白桃汁啫喱,口感頗為清爽,一咬白桃味慢慢滲出;再上一層嘅北海道3.6牛乳吉士忌廉,較晌栗子吉士撻嘅牛乳吉士忌廉為軟身,可能喺受上面白桃嘅汁濕化咗;而撻面嘅新鮮日本白桃果肉鋪得滿滿,亦喺白桃吉士撻嘅亮點,白桃肉真喺具質素,味道清甜帶自然果香,果肉又帶有少少爽脆質感,成件事咪就喺正囉!
 櫥窗內嘅白桃吉士撻
印象中,依個系列嘅吉士撻都推出咗有成年,但到依家都仍然喺店中主打嘅凍餅之一,質感富層次,味道又多變,素材有要求,製作花心思,加上$18嘅定價,仍然熱買都不無道理!

個人評分
味道:8/10
環境:7/10
服務:7/10
抵食:9/10
平均每人消費:HK$18

餐廳資料:
東海堂 Arome Bakery
美孚港鐵美孚站8號舖
2742 6811

沒有留言:

發佈留言