2013年3月7日星期四

樂宴 Rakuen:脂味滋味沖繩牛

近期「沖繩」之名周圍都見,搭地鐵見,睇雜誌又見,去旅行社就更加見,因為依家正正喺沖繩一年一度嘅觀鯨季節,二千零蚊就可以買個套票飛過去親身近距離睇巨鯨,幾爽呀。去得旅行,就梗要品嚐當地美食啦,尤其日本,美食何其多。「沖繩」,依個日本最南端、被海洋包圍、滿是珊瑚與沙灘嘅小島,物產豐富,出名嘅有苦瓜、黑糖、AGU豬、本部和牛……等等,不過要食沖繩美食,又唔一定要飛過去沖繩嘅,En Group旗下多間食肆都喺主打沖繩料理作招徠,繼早前跟朋友去尖沙咀八吉及獲邀去中環樂宴食過兩次美味而富特色嘅沖繩菜之後,今晚有幸再次獲邀嚟到銅鑼灣嘅樂宴,試一試佢哋嘅幾款新菜。
En Group旗下有多間食肆

整體嚟講,一入到樂宴,環境甚有地道和風氣氛,周圍都見到好多日本小擺設,如三絃琴、琉球陶瓷酒杯,幾邊牆身一排又一排嘅泡盛、燒酎、清酒……等酒樽、酒埕,再配合上柔和燈光,唔少日文海報或小旗幟,真喺有置身晌日本居酒屋之中。餐廳近門口有假塌塌米廂房,共3張枱可坐10個人,再行入去大部份都喺4人枱,而最特別喺餐廳最入位置,喺個U形吧枱位,枱前放滿古酒酒埕,幾啱情侶或一對老友邊傾邊食。 
 餐廳不同位置,都富有和風氣氛。
店內有好多日式小擺設
話明主打沖繩料理,餐牌內當然有好多既特色,又地道嘅沖繩料理啦。此外,仲有推廣緊沖繩牛,亦喺有多款選擇!
此為餐牌部份內容,仲有多款特色沖繩菜。
bowl巨峰提子乳酸梳打 $38
未食前,先嚟一杯解渴凍飲,因為加咗乳酸,唔會一朕提子味嘅死甜,飲落幾醒神。
bowl水雲醋物 $50
之前晌八吉試過海葡萄同花生豆腐,印象喺既特色又驚喜,今次能品嚐一下這個水雲醋物,實在喺個好機會。「水雲」依個名好有詩意,初時小弟以為喺借用語,查實佢喺海藻嘅一類,不過產於沖繩一帶嘅珊瑚礁,隨水漂浮,所以就俾咗個名佢叫「水雲」。其實佢個樣極唔討好,沉沉嘅墨綠色,黏黏滑滑,夾起上嚟都唔易,中間又加咗啲白色嘅山芋蓉,同樣滑滑潺潺,但以日本醋調過味後,酸咪咪又滑嘟嘟,都幾唔錯。
bowl沖繩AGU豬肉餃子四味
原味一客6隻就賣$68,依家餃子四味一客有8隻,仲要有4款唔同味道,點都唔會平得過$68啦。4味包括:芝士、墨魚汁、紅蘿蔔同原味,餃子底頗脆,肉餡鮮味多汁。而4味中以墨魚汁同紅蘿蔔較為突出,原來墨魚喺沖繩附近一個離島仔伊江島嘅特產,而紅蘿蔔則喺沖繩糸滿市有名嘅出品,後者更喺因含有胡蘿蔔素就更有益健康!
bowl沖繩香腸拼盤 $68
以沖繩豬做嘅香腸,一份共有3款,整體而言,3款都烤得皮脆肉香,喺佐酒嘅好朋友,而且食得出無亂溝粉,用料十足。至於較深色嘅一款,喺小弟認為較好食,因為有種食潤腸嘅口感。伴有沙律菜,又有檸檬、第戎芥茉作提味,幾好嘅一道熱辣小食。
bowl沖繩風燻豬手拌酸汁 $68
試咗兩款以沖繩豬做嘅菜式,跟住落嚟仲有一款,不過依款就較為重口味。兩隻豬手仔,可以稱得上喺女士恩物,雖然豬手細細隻,而且仲喺無乜肉,不過皮下嘅骨膠原極之多。再者,外皮燒得甘脆,唧啲檸汁去去油膩,減輕內心罪惡感。此外,作為送啤酒嘅小食,亦喺唔錯嘅配搭!
bowl沖繩本部和牛之一口牛柳粒 $320
「沖繩牛」嘅黑毛和牛跟其他日本和牛如神戶牛、松阪牛同樣享負盛名,先嚟一道一口牛柳粒,絕對令人體驗到咩叫肉質甘香、軟腍細嫩、油脂豐盈,只喺少少黑椒調味,就令到肉味非常突出,簡單3個字,就喺滑濃香;大大粒嘅牛柳粒,食得叫人頗為豪氣。伴菜有大露筍,碧綠爽脆,連皮大薯條亦同樣精彩!
bowl薄燒沖繩和牛卷 $280
淨食和牛牛柳粒已非常之正,再嚟依道和牛卷,亦甚為出色。一向食牛肉卷,就只喺慣常嘅金菇肥牛卷,但以薄切嘅沖繩和牛,包住蒜片、蒜子、蔥粒香煎,咬一口除肉汁澎湃,肉質口感好鬆化,加上蒜片、蒜子、蔥粒嘅香味,可謂相得益彰。
bowl沖繩本部和牛火鍋 $458
單睇啲本部和牛外貌,大理石花紋般嘅油花,分佈平均,已引得人流晒口水,代價喺四百五十多個大洋。除本部和牛火鍋,仲有另外兩款:沖繩AGU豚肉火鍋($288)及特選和牛火鍋($298),幾款火鍋可選配壽喜燒湯底(甜味)、泡菜湯底(辣味)、沖繩清湯湯底(原味)。個人覺得壽喜燒或沖繩清湯最啱配本部和牛,因為食得番和牛肉味,確實,和牛輕涮,口感好鬆軟,油脂好香。火鍋仲有大蔥、冬菇、秋葵、豆腐、黃牙白、金菇,材料豐富,和牛底下仲墊有烏冬,作為墊肚之物。
甜品選擇依度明顯比起上次晌八吉就多好多,八吉就只有5款雪糕同1款布甸,但樂宴就較為更有沖繩特色,包括:3款雪糕(黑糖、紅芋、鹽味曲奇)、沖繩冬甩、炸紅芋球、沖繩黑糖年糕、黑糖年輪蛋糕,部份喺雙拼或三拼形式,總之一定滿足到嚐甜之人。
bowl沖繩黑糖雪糕拼炸紅芋球 $62
雪糕嘅黑糖味非常之突出,口感柔滑,又富牛奶香,果然喺高質雪糕;紅芋即喺紅蕃薯,紅芋球以紅蕃薯搓蓉醮芝麻酥炸,外層十分香脆,紅蕃薯蓉清甜柔軟,兩者配搭認真唔錯。
bowl沖繩黑糖年糕 $52
黑糖以甘蔗搾汁後直接熬煮成嘅糖,香味獨特。年糕甜度適中,黑糖味醇厚,回彈力強,口感有點軟軟糯糯,但一客得4粒感覺唔平。
今晚試到多款特色沖繩菜,又跟老友傾咗成晚,真喺一個愉快嘅晚上。開心豈止於此,店方仲由沖繩帶嚟一啲當地糖果、零食同餅乾,特意送俾我哋試食,俾俾意見。所以,真喺非常之多謝,故此拎返去搵埋啲屋企人同朋友,一齊共嚐兼做個評分測試。
bowl沖繩加工黑糖菓子系列
由黑糖本家嘅海邦商事出品,小弟手上一共有5款味道嘅黒糖菓子,分別喺生薑味、紅茶味、菠蘿味、抹茶味及可可味。外型粗糙細細粒嘅黑糖菓子,咬落嘅質感幾似我哋啲片糖,當中以生薑味、菠蘿味、抹茶味最為突出,而紅茶味則而嗒耐啲才感受伯爵茶茶味。但無論喺邊一款,味道都唔太悠長,因為主要都喺面面一層喺加工味道,最終都喺黒糖原味出番晒嚟,而且都頗甜。雖然淨食未必個個啱口味,但作為砂糖代替品,我又覺得有得諗喎,好似生薑味黑糖加落啲唐茶度,如普洱,就成為一杯薑茶,冬天飲啱晒啦!可可味黑糖又可以加落咖啡度,變為朱古力咖啡。此外,密實袋包裝設計,又方便攜帶。
bowl沖繩鹽味曲奇
仲試咗另一款鹽味曲奇,由珍品堂出品,獨立包裝,清潔衛生。曲奇非常鬆脆,鹽味要慢慢食落先至慢慢滲出,味道唔錯幾有趣,未知定價如何。
bowl除此以外,仲有啲金楚糕、角切糖、合桃黒糖……等等,據知部份產品都將會晌樂宴有售,不過最齊就應該晌En Group旗下另一間食肆Okinawa Dining Bridges喇,有興趣試吓沖繩零食,大可到時問問店員有無得買!

個人評分
味道:8/10
環境:9/10
服務:8/10
抵食:7/10
平均每人消費:HK$0(試食邀請)

餐廳資料:
樂宴 Rakuen
銅鑼灣登龍街28號永光中心12樓
3580 8858

1 則留言: