火鍋本色 Hotpot Instinct：彈丸之地

以往食火鍋都喺同班老死去新星任飲任食，經濟實惠有數圍吖嘛。不過，最近有啲走運，無啦啦一個月內獲邀試咗兩間唔同特色嘅火鍋店，之前晌天后琉璃街嘅一鍋，品嚐過店方誠意打造嘅台日式精緻小火鍋；其後，嚟到北角嘅火鍋本色，品嚐以用料新鮮及高質為本色嘅火鍋料理。

火鍋本色位處丹拿道，環顧周圍，都喺啲富貴住宅，再睇其火鍋點菜紙嘅用料及定價，就知佢目標客人喺附近中產，走高檔路線，相對一般街坊或集團式酒樓，火鍋消費高出一、兩倍之多。當然，要食好嘢喺要付出啲代價。店內環境燈光柔和，感覺舒適，無一般酒樓咁嘈；除圓枱外，入面左邊及後排，有幾行卡位，且幾闊落；雖然架設咗幾部電視，一來角度有限，二來無聲，可謂聊勝於無。

湯底晌火鍋中嘅角色都非常重要，所以，坊間火鍋店為湯底一環不斷搞盡腦汁。湯底晌度分為兩大類：創意及特色，前者包括黃金海鮮湯連海鮮拼盤$268、滋補瑤柱花膠響螺頭湯$198、日本清酒花甲蟹湯$138、百子天麻烏雞湯$128、金銀菜白肺湯$88……等13款，無雙拼選擇，亦唔一定全部都喺貴嘢；而後者則包括和風昆布花甲湯$128、招牌蕃茄薯仔豬骨湯$88、招牌秘制四川麻辣湯$88、太史冬瑤田雞湯$88……等共14款，全部都可以揀雙拼，以價高嘅湯底計算。姑勿論喺創意，抑或喺特色，當中有啲確喺幾特別！

湯底，梗有一款啱你心水！

部份火鍋配料售價

八寶冬瓜雞粒湯$88．胡椒豬肚湯$88
原本揀咗太史冬瑤田雞湯，不過無貨唯有改八寶冬瓜雞粒湯。老婆唔多鍾意古靈精怪嘢，所以揀嚟兩個較傳統嘅湯底，雖然喺大路啲，不估唔到「有料到」喎！八寶冬瓜雞粒湯內有蟹柳、冬菇、蝦米、魚肉、蝦仁、冬瓜粒、雞粒，仲要份量唔少添；而胡椒豬肚湯內嘅枝竹同豬肚一樣唔少，以原粒胡椒粒嚟煮，胡椒味香得嚟唔辣，可算喺惹味滋補，濃香暖胃，不過啲鹹酸菜腍得有啲怪。由於湯料多，所以，兩公婆清晒啲料，再飲多兩碗湯，都可以半飽呀！

湯底材料好豐富，唔打鞭爐當湯飲都正呀！

未點火鍋材料前，侍應先送嚟一大個醬料調味盆，讓大家混醬一番，亦喺依度待嘅特色。醬料盆一共有12樣嘢，分別喺：炸蒜粒、魚乾碎、辣椒碎、蔥花、芫茜、蒜蓉、沙嗲醬、辣椒油、芝麻醬、黑醋、紅醋、麻油，賣相相當整潔，井然有序。醬料費每位需收 $18，好難講貴唔貴，不過只可以撈一次，無得再添，而且，如有人真喺對啲醬完全無興趣，唔知會唔會又照收$18呢？另外茶芥每位收 $8，加埋一，有少少未見官先打八十嘅感覺！為咗試多少少，跟老婆所混嘅醬都盡量唔重複。總體嚟講，似乎沙嗲醬嘅味道最突出，沉實中綻放濃郁沙嗲香。

火鍋料基本上分咗9大類：游水海鮮、鍋心肥牛、肉類、巧手餃子、手打丸系、大類雜項、麵類、竹筒類、田園蔬菜。此外，仲供應刺身、精選小炒、佐酒小食，所以俾人有多個選擇，唔一定全晚都食打鞭爐嘢。

田園雜菜籃 $69
一大籃蔬菜，數一數上上下下、前前後後，竟然有成8樣菜之多：皇帝菜、唐蒿、菠菜、生菜、粟米、蕃茄、秀珍菇、冬菇，樣樣望落都挺新鮮，當中最愛超甜粟，實在鮮甜。其實蔬菜、菇菌當然有得散叫，仲有廿多款，定價$29-$48一份，所以田園雜菜籃一份就有咁多嘢，都只喺賣$69，值得推介唔使多諗。

金牌四寶丸 $108
四寶丸有兩款，都喺店方推介，一款叫「金牌四寶丸」（$108），另一款叫「自製四寶丸」（$80），分別在於用料及特色。兩公婆預咗唔會食得幾多嘢，所以就重質唔重量，揀少少高質素嘅嚟試。金牌四寶丸有黑松露丸、芝士海蝦丸、象拔蚌丸、桂花墨魚丸，每款均有三粒，可以話每粒值$9，跟一般魚蛋牛丸大細差唔多。整體嚟講，食得出其用料新鮮，自家手打夠爽彈，而味道方面，以芝士海蝦丸最突出，一來溶透嘅芝士帶嚟濃香芝士味，二來丸內嘅海蝦肉貨真價實，保證咬到大大粒蝦肉，再者，添加咗蟹籽豐富咗份口感；至於黑松露丸嘅黑松味、桂花墨魚丸嘅桂花味，未有預期中嗰份沖擊，味道較為隱若；象拔蚌丸倒有啲似高級版花枝丸，咬到象拔蚌時口感爽爽、脆脆。跟平時食嚟食去都喺貢丸、牛丸、墨魚丸……等大路貨式，依個金牌四寶丸都值得一試，否則單點芝士海蝦丸（$88）實屬小弟首選推介，或者以芝士海蝦丸膽拖另一款作雙拼！

竹筒鯪魚滑．竹筒牛肉滑 $58
點菜紙上有個竹筒系列，原來喺手打蝦滑、墨魚滑、鯪魚滑同牛肉滑共4款，雖然叫「竹筒」，但就跟竹筒完全無關，無論點菜紙上嘅圖片，抑或上枱實物，都只喺以普通瓷碟盛載。前兩者賣$78份，後兩者則賣$58份，一樣可以雙拼。鯪魚滑打咗落湯底灼熟後，鯪魚味濃又爽口，相反，牛肉滑質感有啲怪，唔喺韌，不過又唔喺爽，初時以為淥得耐，所以再試幾次打得細粒啲，又輕輕灼過就入口，但都無份彈牙嘅感覺，反而陳皮香味頗突出，隨牛滑徐徐滲出。

鮮帶子 $98
海鮮類一共有近三十款，不過就未必齊，視乎當日來貨，而全部海鮮都無得雙拼。我哋揀咗一份鮮帶子，約有7粒，唔算好巨型，師傅將帶子界兩刀開三飛，咁就可以輕灼而唔怕熟唔透，又可以食得鮮甜彈牙嘅味道。睇落其實感覺幾新鮮，不過，食落確喺爽甜，但個人覺得鮮味稍有不足。

小湯勺柄位設計有個倒勾，好實用！

散叫隨時失預算，如果唔介意食物方面有少少限制，想有個預算嘅，大可點套餐，有個2人餐（$428）、6人餐（$1,080），另收醬料、茶芥、加一，都已經包唔少嘢，值得考慮。如果喺食肉獸兼和牛粉絲，佢哋仲有個和牛放題套餐，澳洲M9黑毛和牛任食，仲包幾款火鍋配料，蔬菜籃、烏冬、竹庶水、酸梅湯任食任飲，每位$368，已包醬料、茶芥，但要收番加一，而且最大缺點喺限1.5小時，打鞭爐嘅話實在食得好急，未能盡興。

雖然我哋唔喺點好多嘢，但就以上嗰啲，都差啲食唔晒，所以啲特色魚麵、肥牛、其他肉類都未有機會試。至於服務一環，值得讚好，除加湯、斟茶、換碟之外，仲主動幫客人撈泡，等個湯唔會越滾越濁。依晚見越夜越多人幫襯，臨走時仲坐滿客，雖然定價唔平，但好嘢自然有人識欣賞，見佢枱上餐紙印有除北角、銅鑼灣有店外，遠至廣西省南寧市都有，祝願店家繼續發揮其用靚料做火鍋嘅本色，晌各地開更多分店！再次多謝店家嘅款待，及公關嘅邀請。

個人評分
味道：7/10
環境：7/10
服務：8/10
抵食：5/10
平均每人消費：HK$260（試食邀請）

餐廳資料：
火鍋本色 Hotpot Instinct
北角丹拿道18號3-5號舖
2337 9668