2013年3月19日星期二

Fiat Caffe:慢食.快樂美意

提及意大利,講波我就識,曾幾何時喺國際米蘭粉絲,不過已經喺講緊馬圖斯、布林美、奇連士文德國三劍俠嘅年代。講車?幾個專有名詞乜乜渦輪增壓系統,物物擾流器…都喺睇日本動漫「頭文字D」度聽過吓,實際對車嘅認知就真喺小學雞都不如喇!但嚟到意大利快意房車個陳列室,竟然可以唔講車,講食一樣得,因為由太古引入嘅快意,跟飲食嚟個互相串連,搵咗同系集團酒店嘅餐飲顧問David Laris當指導,設計菜式,開咗晌香港首間Fiat Caffe。
晌正門經過,一不留神都未必知佢內裡喺間意大利餐廳,因為櫥窗之內,就真喺陳列咗架房車同一架鮮紅色「綿羊仔」,而餐廳喺晌升高咗半層樓高地台之上,拾級而上之後,仲多有兩架房車陳列,所以佢哋真喺賣車架,唔喺齋裝飾。穿過啲車之後,就會見到餐廳所在地,餐廳唔喺好大,但予人感覺都算闊落,白地磚白牆身,簡潔明亮;黑、白、紅通花膠椅,幾搶眼,如果黑椅換上綠椅,唔知會唔會更具代表性呢?因為意國國旗就喺以綠白紅三色組成,所以全場唯一一張主題餐座特別引人目光,車頭外型嘅雙人皮梳化位,漆上意國三色,份外醒目。
Fiat大賣創新意大利菜式,大概每2、3個月就會轉一次餐牌,一張A4呎吋餐牌就包括晒頭盤、精選主菜、開面三文治(Bruschetta)、意式三文治(Panini)、甜品5大類別,貴精不貴多。另外仲有一張飲品餐牌,同樣A4呎吋,選擇繁多,有餐酒、果汁、咖啡、紅茶。全為散叫,不設套餐,所以晚市消費不便宜。但如果你又想平平哋試試佢嘅手勢,午餐就成為實惠入門,餐湯或沙律、意粉、甜品,配Illy咖啡或Tea Forte紅茶,兩道菜賣$115,三道菜才不過$145。近排仲見佢有個推廣,外賣Illy咖啡$20-$40,11:00am前咖啡買一送一(餐廳開8:00am架),只限閒日,做到10/4,會唔會延期就要再留意吓,附近打工族喜訊,小弟就無福消受喇。
今晚試咗多道美食,有啲喺店方推介,有啲喺小弟自選,但每道菜晌小弟心目中都甚有質素,部份仲帶嚟驚喜,同行嘅表姪女都大讚好食,就慢慢跟大家分享吓當中滋味啦!
枱上鹽同原粒黑胡椒都喺來自意大利靚貨
bowl慢煮銀鱈魚,水瓜柳、甜乾蔥、香草 $125
(Slow Cooked Cod Fish, Mixed Capers, Shallots, Lemon, Fried Garlic and Herbs)
唔好見佢喺銀鱈魚以為喺主菜,查實喺一道集鹹酸鮮味嘅醒胃前菜。亮點喺以慢煮嚟處理銀鱈魚,魚味唔算好濃,但富油香,食起嚟肉質細緻嫩滑。配以火箭菜、紫椰菜,而調味用上水瓜柳、甜乾蔥、檸檬汁、蒜泥、香草,所以味道方面複雜而有層次,值得一試嘅前菜。
bowl火炙吞拿魚、椰菜花、杏仁、榛子油、檸檬 $110
(Seared Tuna, Cauliflower, Almond, Hazelnut Oil Lemon Dressing)
另一道精彩前菜,賣相色彩豐富又立體,而紅潤嘅吞拿魚輕輕火炙,跟食魚生相差無幾,吞拿魚嘅油脂同鮮味十足;當中配料仲有白灼椰菜花、杏仁、酸忌廉麵包粒,混和以榛子油、檸檬、刁草所做嘅醬汁。首次接觸榛子油依樣嘢,味道唔會好強烈,反而據講對皮膚好,能調和同幫助皮膚保持彈性。酸忌廉麵包粒帶外皮嘅會較乾硬帶煙韌,但揀正包心嘅就軟熟帶微酸,蘸點檸檬榛子油,感覺好清爽。
bowl羊芝士意粉 $110
(“Cacio e Pepe” Spaghetti, Black Pepper, Pecorino Cheese and Olive Oil)
跟住上主菜,先嚟喺一道賣相幾有趣嘅意粉,用上羊奶芝士做成一個小「雀巢」外殼,裝起簡簡單單以橄欖油、黑椒、羊奶芝士煮成嘅意大利粉,無論氣味、味道,都好重芝士香,芝士迷嘅「飛弗」,意粉又煮得咬口。然而,個「雀巢」屬好睇多過好食,鹹香,但口感似氧化咗嘅栗米片,淋榭榭咁囉。羊奶芝士有啲地方以音譯叫「皮克利諾芝士」,真身喺比較硬同乾身嘅一類芝士,用綿羊奶汁發酵製成,所以幾重味。
bowl燴意大利肉丸配米型意粉 $95
(Polpette Meat Balls, Extra Rich Tomato Sauce Riso and Chopped Parsley)
第二道主菜喺全晚嘅驚喜,就因為依啲米型意粉,外表似米粒,口感喺意粉,首次接觸,自不然新奇度十足,簡單以少少黑椒碎提味,已好足夠。新奇只可以喺一次性,味道先喺基本功,以豬肉、牛肉混和所做嘅肉丸,鬆軟有肉香,自家搓製,口感粗中有細;襯以濃郁嘅蕃茄醬,味道天然鮮活,有著濃厚意大利色彩,撒把蕃芫茜點綴吓,賣相變得無咁單調,確喺一道值得推介嘅主菜!
bowl意大利脆煙肉配煎蛋伴黑菌 $80
(Fried Pancetta, Stewed Tomato, Fried Egg and Truffle)
三文治就食得多,Fiat都有3款三文治供應,不過,要數特別就不如試試佢個「開面三文治」(Bruschetta),Bruschetta喺以生蒜擦磨表面再烤烘嘅麵包,配以橄欖油及簡單嘅佐料。今回所試嘅開面三文治晌配料方面絕對喺高級版,麵包同樣用上酸忌廉麵包,切一大片墊底,再加上鮮蕃茄片、煎蛋、脆炸煙肉、黑松露油及黑松露醬,可想而知,味道幾咁惹味芳香。仲有,煎蛋睇落普通,但有無留意份煎蛋有幾大?且做到流心效果,晌啲唔顯眼處就會發現到啲細心位。
bowl無花果拼乳清芝士伴白松露菌蜜糖 $95 加風乾火腿 +$30
(Ricotta, Figs, White Truffle, Honey and Olive Oil)
試咗幾道味濃嘅菜式,貪得意,最後嚟一道宜淡宜濃嘅冷盤菜。Ricotta乳清芝士(有譯作意大利農村軟芝士),應屬於未完全熟成嘅芝士,口感上,跟平時晌超市買到嘅茅屋芝士好相似,但奶味就重啲,嗒落會有種沙沙嚡嚡嘅感覺。雖然添加咗白松露菌、蜜糖、橄欖油,但較輕柔,似有還無咁。新鮮無花果果心色澤紅粉,極之清甜多汁,拼以乳清芝士同食,又別有一番滋味,清與濃做到一份調和。另加$30可加配風乾火腿,單睇份量絕對抵食,況且據說用上36個月風乾熟成嘅火腿,而火腿淨食又得,油潤鹹香,搭乳清芝士都得,配無花果最得,鹹甜有致,咁咩喺唔得呢?就喺依$30唔慳得!
bowl菠蘿汁 $25(Pineapple Juice)
bowl熱朱古力伴鮮打忌廉及杏仁片 $35(Hot Ciocoolata, Hand Whipped Cream, Almond)
bowl拖肥意大行泡沫咖啡配白朱古力片 $40(Toffee Cappuccino with White Ciocoolata)
特別介紹吓兩杯熱飲,一杯喺熱朱古力伴鮮打忌廉及杏仁片,鮮打忌廉無疑令熱朱古力更柔滑,但估計所用忌廉嘅份量稍多,略嫌沖淡咗啲朱古力;另一杯喺拖肥意大行泡沫咖啡配白朱古力片,如果鍾意拖肥、焦糖之類,又鍾意飲咖啡之人,依杯泡沫咖啡就滿足你兩個心願,有拖肥嘅甜,咖啡嘅香,真喺甜入心呀!
最後當然喺甜品時間啦,除咗意大利雪糕(由XTC特別供應)外,另外仲有3款甜品,我哋就一於試勻3款。
bowl意大利曲奇 $35
(Selection of Italian Biscotti)
以細細袋小禮包裝,一包有3款,每款有2粒,即喺共6件。雖然叫曲奇,但叫脆餅或餅乾較貼切,佢唔似曲奇咁鬆脆,同埋比較甜,沾咖啡會更好食。
bowl香桃、雲呢拿忌廉、杏仁杯 $60
(Peaches, Galliano Syrup, Whipped Vanilla Cream and Almonds)
面面嘅手打忌廉非常細滑,好有奶香,而香脆嘅杏仁片令賣相好睇一點,襯托番下面嘅香桃。而香桃唔似罐頭貨,因為感覺新鮮,唔死甜,最重要喺個質感較挺身,罐頭貨一般都會被糖水浸到淋晒。另外,用加里安奴甜酒所做嘅糖漿,倒在香桃之上,令香桃多一層金黃色薄衣,又添加一點兒酒香,所以,兩者夾埋一齊食,香甜不膩。當然怕肥怕忌廉嘅人,又唔鍾意酒味,依個香桃杯絕對唔喺你杯茶啦。
bowl意大利芝士杯 $60
(Affogatto, Italian Lady Finger Biscuits, Orange Mascarpone)
臨尾都仲有一個驚喜,意大利芝士餅雖無可能食盡天下,但都叫食下無數,但依個意大利芝士杯無論做法,味道嘅配搭,都頗有新意。先講講個笑話,記得去工聯會學整意大利芝士餅,寫住手指餅,真喺以為嘉頓嗰啲手指餅架,哈哈!先講底層,手指餅浸咗少少橙酒,有別一般只用咖啡酒或拔蘭地,食起嚟有少少積及橙餅嘅感覺;中層嘅芝士餡比平時嘅意大利芝士餅打得挺身,原因喺芝士餡之上,即上層,喺倒入暖笠笠即煮嘅新鮮意大行熱咖啡,故此摸上手上層仲喺熱熱哋,一羹插落去鮮咖啡滲進芝士餡及手指餅之中,咖啡氣味特別香,整體暖和啲,冬天食感覺又變得好唔同。 
服務方面都不得不提,每道菜上枱時,都扼要講講食材成份;甜品環節時,又醒目咁俾多幾隻小杯及小匙羹,方便我哋共享。而近樓梯旁嘅陳列櫃,仲有好些意式食材,唔喺齋擺,可以買走,例如啱啱食過嘅米型意粉$25一包(500g)。
好多謝公關嘅誠邀,因為佢哋開業年多,都已有一定知名度,但都搵我嚟試菜、俾意見,實在非常睇得起小弟,所以晌品嚐每款美食之時,都盡量以食客身份俾俾意見,望能有所裨益。「快意」對你嚟講或者喺個房車品牌,但對小弟而言,就喺個叫人食得快樂嘅美味意菜代名詞。

個人評分
味道:9/10
環境:8/10
服務:9/10
抵食:8/10
平均每人消費:HK$0(試食邀請)

餐廳資料:
Fiat Caffe
銅鑼灣禮頓道77號禮頓中心G5-G6號舖
2960 9222

沒有留言:

發佈留言