萬麗咖啡室 Cafe Renaissance：老細出錢我哋出力．四傻喪食

睇標題就知依次喺有大食大，公司年年週年飯，雖然食親都喺好嘢貴嘢，但同事都唔多想去食，皆因一堆老細在旁，豈能食得開懷。今年卒之爭取到撇甩老細嘅良機，同事自行食番餐，可以如此盡興，當然要喪食，為免喜好不一諗食乜咁麻煩，自助餐實為不二之選，最後，鐵定晌灣仔嘅萬麗咖啡室，一行4人，一收工即趕赴現場，一於上演場「四傻喪食」。

自助晚餐成人收$458，另加一，不過指定信用卡有85折，實為$428一位，包果汁汽水任飲（侍應會自動添加，飲到你唔想飲），另外臨尾仲餐茶1杯，如果喜歡飲餐酒，有個優惠就喺+$120餐酒任飲。
用餐區分幾個部份，對正入面門靠牆嘅一組較闊落，跟住轉左直入有多組枱橩，我哋被安排去到餐廳近尾嘅4人枱，也許距離食物區位置稍餐，但相反就較為靜局，啱我哋吱吱喳喳、嘈喧巴閉、唔停喪影、唔停喪食喇。

其實一入門口轉左一列就喺食物區，順序有海鮮吧、魚生壽司吧、麵檔、咖喱、熱盤、日式薄餅檔，而中間一字長枱就放有中西餐湯、麵包籃、沙律、芝士、肉腸，以及睇到眼傻嘅甜品、糖果、曲奇、生果……等等！總之，食物種類甚多，各款種類睇落都甚具質素，有啲目不暇給嘅感覺，預咗無可能試晒，巡完一次場，影好晒相，就已心裡有數今晚個攻略喺點，想知？下面即該去片！

餐湯
中湯代表喺西湖牛肉羹，而西湯代表喺野菌忌廉湯，味道本應西湯佔優，菌味十足又夠柔滑；點知原來麵檔「兼營」燉湯，實在好易走漏眼，一盅燉湯「杞子圓肉黨參燉牛展」，清甜滋補，即時令中湯輕易取勝。

野菌忌廉湯

杞子圓肉黨參燉牛展

麵包籃．芝士
麵包籃款式絕無欺場，款式多多，數吓數吓都有成10款咁多，並以歐陸包居多，而且附有多士焗爐可供翻熱。同事中亦有好包包之人，大家對住咁多款式麵包亦都心動，所以，索性砌一大碟「麵包拼盤」一齊享用。塗牛油又得，伴芝士都得，因為芝士質素都好有水準，店方提供3款芝士：哥達芝士（Gouda）、丹麥藍芝士（Danish Blue）、金銀畢芝士（Camembert），各有韻味。

沙律．風乾肉．生果
沙律算得上陣容鼎盛，調製好嘅沙律都已經有近10款，如雜豆中東米沙律、雜豆沙律、沙葛沙律、西班牙薯仔沙律、紅菜頭果仁蘋果沙律、越式鮮蝦沙律……等等，好幾款嘅配搭都頗特別；另一邊，大型自助沙律吧亦唔弱，5種沙律菜加埋10多款配料、4款醬汁，最厲害就喺有5支唔同味道嘅橄欖油，真喺撈沙律都開心呀！「齋菜」可能過於單一，見佢有啲風乾肉，就加多片風乾牛肉、風乾豬肉腸落去，再添少少生果粒，咁就成為小弟獨有嘅極上版沙律。順帶一提，生果嘅種類都唔少，包括鮮菠蘿、西瓜、蜜瓜、哈蜜瓜、火龍果、番石榴，所以，臨尾都不得不再整多碟生果盤伴雪糕，滿足晒我鍾意食沙律、食生果嘅興致。

 調製好嘅沙律有近10款

自助沙律吧嘅蔬菜、配料、醬汁、橄欖油都選擇多多。 

海鮮精選
講到海鮮，一踏入餐廳區就即該見到個海鮮吧，當中一列海鮮排開，非常養眼，計有紐西蘭青口、龍蝦仔、翡翠螺、甜蝦、生蠔、開邊龍蝦、長蟹腳，亦喺長期人龍嘅檔口。小弟當然都唔執輸，捧番碟海鮮精選拼盤埋位慢慢嘆。生蠔及龍蝦就最得我歡心，前者鹹鮮有致，後者肉爽膏多，若非仲有好多嘢想試，一定追加呀！

魚生、壽司吧
魚生共有6款，如北寄貝、吞拿魚、鮑片、三文魚……等，另外仲有多款即制壽司及壽司卷，並非唔好魚生，只喺自助餐嘅魚生、壽司一般唔喺必然選擇，所以，相就影咗當參考，食就無試唔多講。

麵檔
除非麵食好有特色，例如有啲特別湯底，又或配料夠晒精挑，否則太大路就都唔多會幫襯。依度個麵檔望落極之普通，可以自動略過。好彩，都因為會影相留記錄，否則就無發現而錯過上文提到嘅燉湯。

咖喱精選
自助餐提供咖喱唔出奇，但自成一檔就少有啲。店方供應3款咖喱菜式：薯仔咖喱雞、馬來西亞咖喱雜菜、咖喱牛腩，以及數款佐料，想配飯、配印度烤餅都可隨你心意。馬來西亞咖喱雜菜香料味紛陳，咖喱牛腩亦炆得鬆化，咖喱菜式做得實屬不俗。

熱盤
再入啲位置，就放有十數款熱盤，相片記錄中概略有炒牛蒡雞絲、翡翠釀瓜環、菜湯浸蝦球、脆炸魚柳、龍脷卷配紅花忌廉汁、扒羊扒、韓式牛仔骨、燒牛柳、西檸雞、炒齋菜、茄子肉碎炆伊麵、泰式炒飯……等等。睇中咗較嘅扒羊扒同燒牛柳晌下面再講，而其他熱盤好隨意試咗數款，炒牛蒡雞絲口感幾特別，龍脷卷配紅花忌廉汁滑嫩好食，韓式牛仔骨帶點辛辣惹味。

日式薄餅
即喺日式燒餅，客人自由選料，註場師傅即時煎製，小弟都幾想試架，可惜同事們無人有興趣，一個人真喺頂唔晒成件燒餅，只好打消一試嘅念頭。

即切烤肉
食唔成日式燒餅都唔緊要，因為仲有樣好嘢等緊我，就喺個自成一角嘅「燒肉」檔，是夜供應喺燒牛肉及燒羊脾，睇見都流口水。除咗兩款燒肉外觀吸引外，另一亮點就喺配醬超多，最抵死佢連醬料嘅原樽都放埋出嚟等你知喺咩品牌，此外，仲「花臣」到有埋伴菜：香燒薯仔，香燒時蔬。既然佢哋咁花心思，無理由我陪埋一齊癲架，所以搵埋熱盤嘅扒羊扒、燒牛柳，加埋依度嘅燒牛肉、燒羊脾，再晌兩邊都夾啲伴菜，配啲心水醬料，噔噔噔噔！賣相唔差嘅雜扒精選即時誕生，好老實，4款扒都好食，無論肉質、味道、生熟度都具質素，感覺難分高下，份扒食得令人心情暢快。

甜品
以花多眼亂嚟形容都無乜點錯，綿花糖、橡皮糖、朱古力豆、牛油曲奇、全麥曲奇、香濃朱古力曲奇、綠茶、朱古力、香橙馬卡龍、紅菜頭啫喱、燴紅果、綠茶泡芙、椰汁紅豆糕、胡桃蛋糕（pecan Cake）、榛子布甸伴白蘭地汁、檸檬麥芯蛋糕（polenta & lemon cake）、椰子蛋糕、意式芝士蛋糕、朱古力松露蛋糕、美國芝士餅、芒果慕絲蛋糕、紅豆綠茶蛋糕、藍莓芝士餅、意式奶凍、白朱古力士多啤梨……等等，加埋5款Haagen-Dazs雪糕（曲奇雲呢拿、咖啡、士多啤梨、朱古力、雲呢拿），喺咪聽落都心郁呢？未計雪糕，小弟盡試都已經有13樣嘢，滋味難以盡錄，只用一句總結，甜蜜在肚中，滿足在心頭！加埋一口氣試咗4款HD雪糕，點可以唔捧肚款吖。話咗我哋四傻喪食，其他同事都擦得一樣厲害，單睇雪糕，最後我哋一共砌低咗13杯HD，絕對有晒交待喇。

雖然晏咗半個鐘到，但就一直食到收場，完全喺老細出錢我哋出盡力，希望明年嘅週年飯都有此安排，等我哋再次四傻喪食。

個人評分
味道：8/10
環境：8/10
服務：8/10
抵食：9/10
平均每人消費：HK$428

餐廳資料：
萬麗咖啡室 Cafe Renaissance
灣仔港灣道1號香港萬麗海景酒店閣樓
2584 6970