「太子」喺間街坊茶記兼小廚，早午就早餐、常餐、午餐、碟頭飯……，夜晚就時令小菜、風味小炒……，由於店家縮咗入順寧道內街，所以都少有生客。環境頗「屈質」，卡位、圓枱拍到密一密，如果坐滿，恐嚇都無乜路行。不過，茶記依啲生意仔，面對食材貴、人工貴、租金仲貴，擺多一、兩張枱做多少少生意，都要體諒吓嘅，況且，嚟得茶記都唔喺「食環境」架啦！
下午茶餐牌，除有經濟抵食嘅中式炒粉麵餐（款款$26）、西式下午茶餐（$27）及自選百搭粉麵餐（即喺車仔麵餐，$25兩餸，$28三餸）外，最鍾意佢為包餐同撈公仔麵餐改嘅名，前者叫包你好運餐（$20），後者叫撈得好掂餐（$28），夠抵死、夠幽默，想嚟開運就不妨點依兩款餐，不過小弟就唔信依家嘢嘅，凡事隨遇而安啦！所有下午茶餐都包啡茶，改凍飲都喺加$2。
魚柳包
原來喺表姪女嘅心水，雖然只喺賣$20一份嘅包餐，但睇落個魚柳包製作唔馬虎，長形餐包底面、內籠都烘過，包內夾有生菜同蕃茄，加少少沙律醬，主角就喺塊吉列魚柳。雖然無試過，但觀乎賣相，以及睇表姪女個滿意樣，應該都唔錯。
我哋幾個成人當正餐，當然要點啲飽肚少少嘅嘢啦，中式炒粉麵餐就最啱我哋，連餐飲都喺賣$26，不過先旨聲明，份量比正價碟頭炒粉麵少約兩成左右，唔嫌選擇少，仍然划算到極。
楊洲炒飯所食嘅3個炒粉麵中，以依個楊洲炒飯最唔得，一來料少，主要得幾粒火腿；二來感覺炒得俹簁，啲飯粒無期望喺金鑲銀，但就似幾片蛋絲就咁兜落啲飯度，啲飯粒好似無炒過咁！
乾炒叉燒意
最好食嘅一碟，意粉炒得均勻入味，其實都只喺豉油味，但就爽身唔油，又夠香，餸料至少明碼實價睇到幾舊叉燒。
乾炒牛河
牛河都唔太差，跟乾炒叉燒意比，只喺油咗啲，河粉無話炒到碎濕濕，牛肉亦比想像多，需知依家牛肉賣得幾貴，唔好忘記個乾炒牛河連餐飲先收你$26咋！
餐飲
表姪女要熱華田，表嫂就要熱檸茶，我同表哥不約而同都要奶茶，無他嘅，奶茶始終都喺茶記出品好，穩膽之選囉！
經濟實惠嘅下午茶餐，令附近街坊有多個慳錢選擇，所以見隔離枱個阿叔都帶埋個孫嚟食，小店自有其存在價值！希望佢繼續晌小區中為人民服務。
個人評分
味道：7/10
環境：6/10
服務：6/10
抵食：8/10
平均每人消費：HK$25
餐廳資料：
太子小廚餐廳
深水埗順寧道41-45號裕成大廈A-B舖
2720 3908
味道：7/10
環境：6/10
服務：6/10
抵食：8/10
平均每人消費：HK$25
餐廳資料：
太子小廚餐廳
深水埗順寧道41-45號裕成大廈A-B舖
2720 3908
沒有留言:
發佈留言