好多人覺得住美孚嘅有錢人多，不過，窮人亦都唔少，所以一啲地踎小鋪一樣有市場，定價但求大眾化，垃垃雜雜乜都
賣，新開幾個月嘅「荔灣小食車仔麵」就喺一例。原先依個鋪位，喺個菜檔，賣啲菜都幾平架，轉手之後竟然喺開咗檔賣粉麵、車仔麵、港式早餐、碟頭飯嘅小店。
唔使入鋪都知有咩食，皆因鋪面貼滿介紹，因為鋪位細細，供應嘅款式都較為有限，附近嘅茶記、快餐店講緊早餐嘅選擇有成廿多種，晌度就一隻手數得晒：3種。當然，全日供應嘅車仔麵套餐都可以成為你嘅是日早餐嘅！
雖然地踎，都有少少裝修，不過如果留意吓佢啲枱櫈、餐具，就知喺拉雜成軍嘅組合，取自夜冷鋪嘅配搭。由於我哋都成十點幾先落嚟食早餐，所以一個客都無，而樓面、廚房、送餐、收拾就由兩個阿姐一腳踢負責晒，入面仲有個廚房仔，見一個師傅埋頭苦幹預備午市嘢。
店尾有個廚房仔
早餐B $23
小弟就要咗個早餐B，即喺火腿通粉、煎雙蛋，配啡茶。火腿通粉好普通，湯頭無乜味，煎雙蛋嘅蛋黃熟晒，無晒蛋汁，不過無多士跟，有無蛋汁都無所謂吧！奶茶算喺不過不失，感覺喺比快餐店好嘅。但喺，試過之後，我寧願比多$1去美孚冰室食佢個牛尾湯螺絲粉配腸仔煎蛋早餐喇！
炒麵 $10．皮蛋瘦肉粥 $10
老婆就唔要早餐ABC，反而散點炒麵配皮蛋瘦肉粥，個炒麵炒得唔錯，唔太油，炒得「勻巡」；但個粥就唔得，一來都幾細碗吓，二來啲粥唔夠綿喎，三來好少料，皮蛋跟瘦肉得嗰丁啲，整碗粥更唔夠熱。
早餐就認真麻麻，唔知佢啲車仔麵又掂唔掂？兩餸麵$20，加餸每款$6，配豆漿$3杯，汽水$5罐，搵日想慳慳哋，都可以走落嚟撞吓彩數！
個人評分
味道：4/10
環境：4/10
服務：6/10
抵食：6/10
平均每人消費：HK$22
餐廳資料：
荔灣小食車仔麵
美孚美孚新邨第一期9座6號C鋪地下
6249 6440
沒有留言:
發佈留言