雖然鴻福稱為海鮮菜館，但格局跟去茶記無乜分別，若非門口左邊有幾個大魚缸，有啲海鮮游游吓，恐怕大家都喺當佢茶餐廳，日頭嚟食碟頭飯，夜晚就小炒做晚餐。
由於鴻福位置較偏，唔喺咩大集團、鏈鎖店，又唔出名，所以都喺街坊客多，生客欠奉，故此啲侍應同客吹水多過乜。今日本來同啲朋友去曼克頓山「又一間」食晏，但好多人等位，樓上間「稻坊」亦一樣好多人，「家傳滬曉」又嫌佢貴，所以退而求其次行番過少少美孚新村嘅「鴻福」，入到去約六乘滿，話咁易就有成張細枱，其實都算有幾多街坊支持，不過，感覺生客少，間鋪又唔算好有特色，賣點唔多，附近茶記唔少，又有兩間鏈鎖酒樓，競爭唔細，估唔到小弟篇食評都未出，佢咁就結業咗！
以碟頭飯計，佢又唔喺好差，價錢都OK，午餐收$37（鮮茄豬扒飯、餐肉煎蛋飯）、$40（蒸鯇魚），有例湯，有熱飲，一般炒粉飯麵都喺$32-$40，冷熱飲品+$7，跟對面間大家樂都不相伯仲，唔差得遠。
例湯
西洋菜煲豬骨，雖感覺無味精，但味道偏淡，不過不失咁啦！
鮮茄豬扒飯
茶記嘅碟頭飯晌飯嘅份量上永遠有保證，一定俾得有多無少，最估唔到連啲豬扒都俾唔少，亦已經切細件，方便食用，而且豬扒酥炸過，就算喺雪藏貨色，都變得較為甘香；由於淋上嘅喺蕃茄汁，雖則色澤睇起嚟好鮮色，感覺有點假，但酸香中和咗油膩，蕃茄搭炸豬扒幾時都咁相襯！
奶茶
唔多講，有睇開小弟食評都知，茶記餐飲定律，身體無乜大問題都一定揀奶茶，都甚少晌茶餐廳飲到難入口嘅奶茶，頂多喺未夠香、唔夠滑啫。鴻福嘅奶茶不俗，柔滑度個人而言就差少少，但茶香搭夠，一樣收貨。
依家咁嘅時勢，一客碟頭飯，飯多餸又多，又有例湯，又包餐飲，都喺賣$37，仲想點？！鴻福，可惜你都喺結業收場。
個人評分
味道：6/10
環境：5/10
服務：6/10
抵食：7/10
平均每人消費：HK$37
餐廳資料：
鴻福海鮮菜館
美孚美孚新村4期百老匯街69-119號地下101A舖
2310 0055
沒有留言:
發佈留言