2013年3月16日星期六

家常便飯 Home-made Cuisine:我家便飯無咁豪

講開家常便飯,老婆就唔嫌麻煩鍾意晌屋企煮,因為真正做到無味精、少油、少鹽,我哋所做嘅菜式真喺好家常,蒸鯇魚、蕃茄蛋、煎吓紅衫、豆豉蒸排骨、榨菜蒸肉片、煎雞翼、蝦殼碎蒸水蛋、灼吓菜芯、生菜……等等。今日幸運被抽中,出席非一般家常嘅「家常便飯」新店優先試食會,試試佢嘅菜式有幾「家常」?本應試食會可以帶一個朋友去,最可惜喺老婆唔得閒,要小弟單拖一個,所以等我食埋佢嗰份!
「家常便飯」於舊年8月落戶灣仔謝斐道,奧海城只喺第三分店,因為舊年10月已將第二分店設於深圳福田。由於喺新店優先試食會,包晒全場,足有80、90人。店鋪以白色為主調,四周白色牆身,配以杏色皮椅,淺啡木枱,感覺樸實整潔,裝潢簡約。大多數喺4人活動式座位,可調配至6人、8人座,亦有部份卡位,而店嘅後方有啲圓枱,不過咁,有啲枱櫈拍得有啲逼。而最得意莫過於枱上張餐紙,成份報紙咁,裡面有好多關於店家嘅介紹,緣來緣起,創辦理念……等等都可以晌度搵到,最抵一欄猶如舊報紙啲分類小廣告,原來全喺店家主打菜式及介紹,玩味十足!
bowl健康蕎麥茶 $12 / 壺
蕎麥茶嚟自雲南,功效就唔喺好識,呢家嘢老婆叻啲。但喺味道清新,麥味幽香,最鍾意個茶壺設計,蕎麥茶包放晌中間濾心,絕無茶葉碎嘅「騷擾」,全透明壺身,唔使揭蓋侍應都知何時添水。唯一喺保溫能力低,所以有時侍應嚟添水都叫佢唔好住,免得太快又攤涼晒!
一邊飲住靚茶,一邊聽靚女公關介紹。「家常便飯」可算得上喺季季紅集團嘅副線,但提倡健康飲食態度,以3個生產線為骨幹:第一線,將廣東家常小菜打造一系列創意小菜;第二線,以自家有份投資嘅農場菜場所出嘅家禽同蔬菜,製作出星級版家常小菜;第三線,靚湯系列、外賣菜式,等客人可帶返屋企跟家人分享。此外,奧海城依間分店仲增設咗燒味部,一道冰淋醬黑鬃鵝(帝皇鵝)更喺店家推介,堂食、外賣(需預訂)均可。
bowl三層架特色拼盤 $210(6人用)
原本晌菜牌嘅三層架特色拼盤喺包括芝心花枝丸、香煎蓮藕餅及秘製士多啤梨醬炸魚塊,供6人用,估計每款有6件。三層架特色拼盤亦喺店家嘅特色菜,今日都有機會品嚐,不過就以蓮藕鹹蛋南瓜球取代咗芝心花枝丸。其實以上各款菜式都有散叫,個人覺得叫菜按自己口味,散叫心水仲上算,反正個價相差無幾。
bowl香煎蓮藕餅 $70
蓮藕薄薄切片釀有豬肉,煎得焦香,蓮藕片確喺幾爽脆,豬肉幾緊至,蘸上芥末蜜糖沙律醬,多份惹味之餘,減少咗油膩感。當然,由於今日試食出菜以4人份,所以正價一份應該唔止4件嘅。
bowl秘製士多啤梨醬炸魚塊 $70
個人對炸魚塊嘅三大要點,第一就要夠新鮮熱辣,今日要應付80多人份量,同一時間出菜,放涼咗令熱辣度大打折扣,有啲無奈;第二要炸得鬆脆,依方面就絕對達標,外層脆漿夠薄,咬起嚟咔嚓作晌;第三就睇睇魚嘅質量,龍脷柳肉質軟滑,足以收貨。而自家秘製粉紅色嘅士多啤梨醬,淡淡士多啤梨味,帶微酸,大膽啲增加酸度亦無妨。
bowl蓮藕鹹蛋南瓜球 $70
三個小菜,以依道南瓜球較得小弟歡心,主因都喺有南瓜啫。以南瓜蓉、鹹蛋黃、蓮藕粒搓成波波酥炸,不過講就蓮藕粒,但小弟不知何解細嚼幾次都覺得似馬蹄粒?外層幾香脆,南瓜蓉好粉香,鹹蛋嘅鹹香就似乎唔多突出。
bowl冰淋醬黑鬃鵝 $388(全隻),$198(半隻),$88(例牌)
冰淋醬黑鬃鵝喺店家今年最引以自豪嘅全新招牌菜,因為選材來自自家投資農場,系出佛山名門嘅黑鬃鵝,以走地方式飼養,皮下脂肪少。黑鬃鵝有3個份量,人多人少嚟點都得,今次我哋試到嘅喺半隻,份量不少,6-8人食都可以呀。燒鵝外觀色澤亮麗,金黃平均,皮薄香脆,肉質細緻,鵝油甘香,肉汁豐盈,又真喺幾得喎。配上秘製冰淋酸梅醬,比一般酸梅醬感覺清甜順喉,有助減低鵝肉肥膩感,都不愧為風味獨到嘅招牌菜。
bowl籠仔芹香芋荷炆黃油雞 $78
整餐飯最熱騰騰就喺哩道菜,睇睇餐紙嘅介紹:「鮮嫩嘅黃油雞,配以營養豐富嘅西芹菜及芋頭梗炆香,再以荷葉包裹,荷葉香氣滲透其中,口感層次豐富。芋頭梗益腎氣,健脾胃。」睇落都好似幾厲害,個人而言,不過不失,一向都覺得啲荷葉菜式都唔多可以做到有荷香嘅境地,而雞肉雖然不錯,不過感覺似金針雲耳蒸雞一類,唔覺有咩特別,食完都唔會令人太有印象。
bowl蝦禾米蛋卷伴泰式辣醬 $78
今次另一亮點推介,因為「季季紅」一道蝦禾米乳香豬,被米芝蓮列為推介菜式,正所謂一登龍門自然升價十倍,「家常便飯」再下一城嘅承傳菜蝦禾米炸子雞,亦好評連連,所以,再嚟依個蝦禾米變奏版,當然抱有期望。不過,老套一句:希望越大,就失望越大。小弟唔知我依碟炒飯喺咪同所有人食到都來自同一煲飯,好老實,飯粒炒得唔夠爽,香味無乜,蝦米唔多,味道偏寡,蛋皮略厚。其實依道菜頗有創意同心思,我細妹都晌藍地總店食過佢嘅蝦禾米乳香豬,仲大讚特讚,所以小弟覺得依道菜水準不至於此,希望下次再幫襯喺有一番驚喜。
bowl蟹籽桂花瑤柱炒韓式粉絲 $68
創意小菜之一,差啲以為喺炒粉飯麵,哈哈!公關介紹依道菜時有啲摸錯,話粉絲中會滲出桂花香,實情喺貌似桂花嘅炒蛋碎啫。韓式粉絲晶瑩剔透,不過嫌佢碎濕濕,雖然加埋上等瑤柱絲,但食落唔覺,味道偏淡較寡,至於蟹籽亦只喺面面一小撮,裝飾大過實際。
bowl蠔皇冬菇鮑魚海蔘黑松露上海拉麵 $288(2人份)
除一眾家常小炒,仲有一系列富豪必食精選,例如:富豪素翅鮑魚叉燒飯($138)、蝦籽金磚鮑魚($128)……等等。而最後送上喺一道蠔皇冬菇鮑魚海蔘黑松露上海拉麵,要成$288一客,絕對要落足心機細嚐。蠔汁所扣嘅冬菇、鮑魚、海蔘都非常入味,濃香惹味;而上海拉麵煙韌有彈性,添加埋黑松露醬,芳香悠揚,認真貴氣。好有個性嘅麵食,不過就花費不菲,相信唔會晌我嘅家常便飯中出現咯!
咪以為叫「家常便飯」就淨喺可以嚟食晏或晚飯,佢哋一樣有供應早餐($25-$38)、下午茶($24-$88,$88喺二人用嘅點心套餐),仲有別一般快餐店、茶記款式,好似醒神早餐B,鮮帶子奄列,煙鴨胸通心粉,焗牛油脆豬仔包,配餐茶,都喺賣$38,喺咪都幾吸引呢!

以「家常便飯」灣仔店嘅水平,應該好唔錯,雖然用料上好,做菜亦有心思,不過味道未有期望之高。總結嚟講,新店仍需很多磨合,運作有待繼續改進,始終一下子要應付80多人餸菜,要同一時間出餐上枱,確實唔容易。但信相以其管理可將問題慢慢修正,今次俾住個OK先,相信下次再嚟應該可以有個笑面,祝願店家做出更多好菜,讓更多人晌度食到非一般嘅家常便飯!藉此再次謝過店家邀請。

個人評分
味道:6/10
環境:7/10
服務:8/10
抵食:6/10
平均每人消費:HK$0(試食活動)

餐廳資料:
家常便飯 Home-made Cuisine
大角咀海泓道1號奧海城3期地下G22號舖
2618 2316

沒有留言:

發佈留言