六記甜品森林 Dessert Forest：夏日解暑洛神花果凍

跟親友晌美孚食完飯，親友嘅細路又話想食甜品，因為酒樓嘅甜品選擇唔多，所以就過嚟區內唯一一間甜品專賣店。上次同老婆嚟試過佢嘅芒果黃金撈同生磨芝麻糊，前者有啲新意又幾好食，後者就令人失望而回，一正一負，總評都只可以喺俾個OK，唔知今次又會點。

特色朱古力芝士餅 $25
小弟揀咗依個朱古力芝士餅，講話「特色」，有啲言重，不過入口朱古力味跟芝士味都幾平衡，唔會話邊個搶邊個嘅味，而口感亦都頗柔滑，算唔錯。

洛神花椰果果凍 $16
夏日嘅解暑之選，以洛神花做嘅果凍，本身已經帶有酸酸甜甜嘅味道，入口又一朕清涼，令人感覺好清爽、好涼快，而內裡嘅椰果令口感多變一啲，一客4粒，大家分享就最好不過。

招牌糯米糍 $20
有芒果餡或紅豆餡，逢星期六、日供應，一客4粒嘅糯米糍「身形」挺健碩，大大粒沾滿椰絲，糯米皮加入芒果汁搓成，再入埋內餡嘅芒果肉，食落滿有芒果香，果然不負招牌之名。

今次所試嘅幾款甜品都比上次好，都值得比個笑佢。不過，回顧番其家食家嘅食評，見佢啲甜品多年都無乜點變，近來晌外面試咗好幾家新開甜品店，都喺有新意，有質素。甜品森林晌依區最大優勢，就算稱得上「獨市」，周邊有賣糖水嘅都只喺兼營，好似地鐵口附近嘅燉奶佬。一日晌依區競爭唔大，以佢目前「牌面」生意應該仲有得做！

個人評分
味道：7/10
環境：5/10
服務：6/10
抵食：8/10
平均每人消費：HK$20

餐廳資料：
六記甜品森林 Dessert Forest
美孚美孚新邨六期恆柏道2-4號N291C
6979 5156