2013年2月6日星期三

甜甜地甜品屋:彩繒花瓷碗裡的石磨靚糊

晌深水埗明星海鮮酒家跟屋企人食完團年飯,路經紅車厘紅車厘麵包西餅:角仔.牛耳.買嚟賀年自己食又賣咗啲炸油角、牛耳返屋企應節過年食,都已經行到去地鐵站口口,老婆突然一句話請我食糖水喎,小弟就當然樂意奉陪啦。
晌深水埗地鐵站北河街個出口,第一時間就想起「甜甜地」,因為之前已經食過,覺得唔錯,有水準,而且收費又實際,兼且唔使點等位。由於依家先9:00pm左右,唔喺食糖水嘅黃金時段,就更加客人唔多。今次再去,環境明顯跟上次唔同晒,入門口左邊全行及右邊近門口位置改晒做卡位,而且每卡都頗為闊落,再入啲就依舊喺啲可隨意調配組合嘅2、4、6、8人枱,不過一睇就知喺新枱。再睇番上次嚟嗰次啲相,主要都喺換咗啲枱,廚房外觀、啲櫈、牆上啲介紹……等等都喺一樣,但整間鋪印象上就比以前光猛咗。
之前未換枱時嘅舊樣
對比番上次個餐牌,發現款式有少少改動過,有啲啲加減,但變動唔大,價錢亦只喺酌量加$1-$2,有啲仲好似無加,好似紅豆沙、綠豆沙都仲喺賣番街坊價$13,楊枝金露照舊$24,添加西米、雞蛋、九份雙丸保持番+$2、+$3、+$6。依家來貨成本、人工、鋪租加得咁多,佢哋都算加得極溫和。
之前未加價時個餐牌,不過只喺部份嘢加$1-$2,部份仲喺舊價。
老婆對食糖水喺有少少「傳統人」,唔太鍾意啲古靈精怪嘢,咩幻彩曲奇、咩咩咩芒果撈河……佢唔太啱,加上是晚都仲幾凍,食生磨糊類就最啱佢,咁小弟都配合吓佢,就一齊「食糊」。
bowl補腦合桃糊 $17
合桃糊以彩繒花瓷碗盛載,比起一般糖水鋪用膠碗,更耐熱,兼且外觀好睇好多。合桃糊嘅色澤唔使廢話多形容,咪就喺合桃原色,上枱時好平滑,再滔一羹睇睇,感覺好滑溜,稀杰度拿捏準,因為啲糊回碗時形成少少層次,無耐就回復番平滑,質感真喺好得。齋好睇如果唔好食又喺死,試一啖,合桃味非常芳香濃郁,貨真價實嘅感覺,而且,食落果然好細滑柔順,絕對喺上乘之作。比起同區嘅「綠林」,純以小弟嘅標準,可以話喺不相伯仲。如果要推介,我就揀「甜甜地」喇,因為綠林賣$18,貴1蚊雞,仲要經常要等好耐位兼逼爆唔好坐。
bowl滋潤杏仁糊 $15
小弟覺得「甜甜地」個老細好似衝著「綠林」嚟定價,又喺平佢$1(綠林賣$16)。杏仁糊外貌幼滑得如燉蛋白咁,雪白得很,同樣,質感一樣好柔順,杏仁味極之清香。最啱心水就喺兩糊都屬於少甜出品,因為太正太好食,食到尾我哋都盡量刮乾淨唔好嘥,更有趣嘅喺,食到碗底又再出現一朵彩繒大紅花(小弟對花唔熟,我估喺大紅花啩),感覺有一份悠然雅致。
啲糊好正,刮得一乾二淨!
除咗環境好咗,啲糖水依然咁有質素之外,老細(我估招呼我哋嗰個喺老細,因為佢個樣跟門口招牌個「嘜頭」有9乘幾相似)有禮又好好招呼,我哋研究咗好耐睇吓食乜,佢就話慢慢睇唔使急,睇啱搵佢;啲糊嚟到,又同我哋講小心熱,慢慢食。晌牆上都見佢印有店舖網頁,又晌臉書開埋戶口,睇落都喺有心想搞好檔甜品屋。新一年喺蛇年,希望佢哋生意興隆,多人多到排隊打蛇餅啦!

個人評分
味道:9/10
環境:8/10
服務:8/10
抵食:9/10
平均每人消費:HK$16

餐廳資料:
甜甜地甜品屋 Tian Tian Di Dessert House
深水埗福華街120號地下
2398 9499

沒有留言:

發佈留言