2013年2月9日星期六

多彩皇宮 :團年飯之濟濟一堂年夜飯

卒之去到最後一餐團年飯,亦喺大除夕正日嘅年夜飯,就喺同一大班親戚一齊食,因為都幾大棚人,大人細路有成27個,所以包咗個房,筵開兩圍,不知幾開心高興。其實「多彩」依間街坊酒樓,我哋一班親友確喺有啲情意結,未改名前叫「多彩海鮮酒家」,兩年前新裝修兼改埋名叫「多彩皇宮」就未嚟過,以前中秋、冬至、團年經常晌度包房做節食飯,但喺自從大姑媽過咗世,好耐無再嚟多彩喇,小弟就無機會再跟佢嚟嘆早茶添。
由於有親友要去睇Big Four演唱會,所以我哋就一早6:30pm開席,食到8:30pm左右就完晒。不過,仲有大部份人未走,因為包咗房可以玩到酒櫻閂門,所以一班表姪仔姪女就晌度唱K唱到夠,有啲就遲少少走去行花市,小弟有咩搞,咪返屋企包利是囉!
個全包宴菜式跟一般酒席分別唔大,一共8道菜、兩個飯麵、壽包、糖水、果盤,講明全包,茶芥、卡拉OK、加一服務費自然亦都包埋,仲送啤酒汽水共12罐及紅酒一枝。由於有親友跟酒家相熟關係,價錢跟番平時五、六、日個價,無用節日價,算喺平少少。
bowl白灼生海蝦(1斤半)
份量足秤,相信絕對夠1斤半,啲海蝦又幾新鮮大隻,無霉無爛,挺鮮甜,蘸點豉油已經好唔錯。
bowl鴻運燒味拼盤(22兩)
唔知點解張菜單咁刻意寫住22兩重呢?又未到斤半24兩喎!總之個燒味拼盤有燻蹄、豉油雞、叉燒、燒鴨同中間爽爽哋嘅筍菜(唔喺太確定個菜名,因為印象中都好似第一次食),燒味質素夠平均。
bowl碧綠花枝蚌片(菜14兩、肉10兩)
又喺好搞笑咁寫住菜14兩、肉10兩,夾埋1斤半。花枝柔韌鮮甜,而桂花蚌爽脆咬口,配搭碧綠嘅蜜糖豆,感覺幾清清爽爽、簡簡單單!
bowl沙汁海皇卷(12件)
唔算好「海皇」,食極餡料主要都只喺有啲蝦粒,溝埋啲雜果。炸得色澤均勻,幾甘香,外皮有啲厚,但唔太油都已經收貨。「沙汁」查實只喺普通嘅沙律醬啫,無再作任何嘅處理或調校。

bowl紅燒花膠雞絲翅
一大窩紅燒翅,分到都有成14碗。當然花膠同雞絲多過啲翅,雖則喺咁,花膠、雞絲確實幾多,碗碗都有近一半喺料,而魚翅就奀啲,撈極都得嗰三五七條仔。不過,純以一窩湯羹計,味道都唔錯。
bowl蠔皇鮑菇扒翡翠
菜名已講明喺「鮑菇」,所以唔好有期望,不過好老實,啲鮑菇口感又幾似食鮑魚,煙煙韌韌咁,仲有少少啜口添,哈哈。加埋以蠔汁扣,外觀都呃得吓人啦,再者個蠔汁做得幾濃。生菜就略嫌灼得稍熟,腍身咗,無晒爽脆感。
bowl清蒸大海石斑
條大石斑果真幾大條,估計兩斤有多,伴以薑絲、蔥絲清蒸,小弟就覺得喺食魚鮮嘅最好烹煮方法,既食到魚嘅嫩滑,又試出魚嘅鮮味。今晚條魚都唔錯,蒸得啱啱好骨肉分離,魚肉都挺鮮滑,又帶微微薑蔥香,好食。
bowl多彩脆皮燒雞
隻雞似乎都幾大隻,因為斬開嘅燒雞鋪滿一大碟,外皮燒得幾香脆,肉質頗為嫩滑,果真都做到色香味全喎!
bowl臘味糯米飯.鮮菇炆伊麵
輪到「四大發明 – 粥粉麵飯」環節,飯有臘味糯米飯,認真麻麻,啲糯米飯煮得較爛,所以味道點好,又或臘味點多,都無補於事;而麵有鮮菇炆伊麵,個伊麵比個糯米飯好好多,亦唔算好油,但好似食緊淨炆伊麵,鮮菇欠奉。
bowl蟠桃(1打)
12個蟠桃逼滿一大籠,雖然部分有啲裂,不過送嚟時熱辣辣,感覺好「新鮮」。估唔到幾有水準喎,包身好軟熟,蓮蓉餡清甜柔軟,最啱喺少甜,感覺健康啲嘛。
bowl滋潤甜品(1窩)
糖水比較傳統,只喺陳皮紅豆沙,但至緊要好食就無所謂啦。紅豆沙色澤較黑,但好有紅豆清香,而且煲到起沙又夠綿,幽幽陳皮果香,算唔錯啦!
bowl鮮果拼盤
果盤有西瓜同甜橙,陣容就比較粗疏啲,志在有啲飯後果提供俾大家啫。
今餐團年飯,故然大家一大棚親戚圍埋聚一聚高興吓,大於喺咪食到好嘢,所以食都喺其次;不過若論質素,今餐算唔錯,份量方面無欺場。故此下次再搞,可考慮再嚟過。

個人評分
味道:7/10
環境:8/10
服務:8/10
抵食:8/10
平均每人消費:HK$225

餐廳資料:
多彩皇宮 Wonder Land Seafood Restaurant
石硤尾南昌街美彩樓地下
2778 0622

沒有留言:

發佈留言