餐包以依度嘅環境及價位，仲喺提供茶記水平嘅餐包，未免有啲失禮；再者，麵包只喺微暖，仲有少少乾添，感覺喺稍為欠缺誠意囉！
菠菜忌廉湯我同老婆都轉為套餐，一客要普通嘅是日餐湯，另一客要龍蝦湯。是日餐湯嘅紅方代表喺羅宋湯，白方代表喺菠菜忌廉湯，如果跟番個餐包，哩個忌廉湯就好配喇，完全港式快餐店水平，極之普通，無乜菠菜味之餘，質感又稀。與其叫菠菜忌廉湯，小弟就覺得應該叫忌廉湯加菠菜汁囉，我真喺有啲衝動想問個廚你知唔知咩叫做菠菜忌廉湯架？嗰時興趣班工聯會阿sir喺咁教：菠菜、洋蔥炒軟，落雞湯打蓉，隔渣，加麵撈，最後撞忌廉，下鹽、胡椒調味。
龍蝦湯個龍蝦湯睇落就對板啲，色澤同稀杰度似模似樣，不過賣相稍嫌俹簁（音：乸西），佢都加咗忌廉晌面，大可畫花方面做靚少少。湯中嘅龍蝦味超強勁，不得不讚，有點可惜喺偏鹹，美中不足之處。
鐵板海鮮大會 $158屬於上文介紹過嘅鐵板系列之一，依個系列一共有7款，價位為$108-$158，雞牛豬魚雜扒等等，跟出面豉油西餐賣嘅鐵板餐唔喺太大分別，因為老婆近期要戒牛肉，所以就揀鐵板海鮮大會配紅酒燒汁伴薯菜。海鮮有龍利柳、大蝦、帶子、魷魚、青口，每款料都幾有睇頭，尤其大蝦、帶子及魷魚，頗鮮味，配以紅酒燒汁，味道濃香啲，相反，啲龍利柳稍為鹹咗。薯菜喺翠玉瓜同紅蘿蔔配「麥記」炸薯條，份量仲唔少添，薯菜以外，亦可揀飯或意粉。
鐵板波士頓龍蝦半隻拼厚切豬扒 $178喺時候輪到龍蝦出場，另一個喺活波士頓龍蝦鐵板系列，半隻龍蝦（250g）可以拼厚切豬扒、雞扒、龍利柳、西冷牛扒、牛柳共5款，由$178-$198。其實醬汁有4款：紅酒燒汁、忌廉野菌汁、咖喱汁、黑椒汁，上面個鐵板海鮮大會揀咗燒汁，所以依個龍蝦鐵板選上忌廉野菌汁，因為唔想汁醬太濃味而搶咗龍蝦嘅鮮味。其實250g龍蝦去除個殼凈肉計唔喺好多，大大件龍蝦拑肉俾晒老婆食，佢話好正，我就食個蝦身，確喺非常彈牙鮮甜。件厚切豬扒幾大件，不過除咗乾同韌，都無咩好再評喇。雖然小弟揀要意粉，點知都有啲翠玉瓜同紅蘿蔔。由於汁少，意粉有少少乾身同韌，所以向侍應要求加汁，依樣佢哋又好大方喎，成兜忌廉野菌汁拎過嚟。
熱情果芝士餅 $38去到尾聲，有啲意猶未盡，雖則套餐唔包甜品，加配甜品亦無咩優惠價，但喺都想試一試佢哋自家製嘅甜品。當晚有4款甜品：原味、朱古力、熱情果芝士餅及心太軟，幾款都啱心水，不過以熱情果芝士餅未試過，所以點一客跟老婆一齊分享。蛋糕質感軟滑，入口芝士味好出，細細嗒落熱情果酸甜香味悠悠滲出，挺高質素，而且芝士餅之上嘅士多啤梨，既大粒，又清甜，總算臨尾得份安慰大獎。
餐飲老婆要熱檸水，小弟例牌點咖啡，咖啡不俗，頗為香濃，如果跟咖啡啲奶喺暖嘅，就可以加啲分，可惜喺冰凍呢！
個人評分
味道：9/10
環境：7/10
服務：8/10
抵食：8/10
平均每人消費：HK$235
餐廳資料：
Melissa
荃灣楊屋道1號荃新天地地下G48舖
2153 0848
沒有留言:
發佈留言