2013年1月22日星期二

Le Menu:六國大豐嚐

唔講真喺唔知六國原來有成80年歷史,早在30年代已經啟業,並晌1986年重建,即喺依家個靚樣,以優質嘅商務酒店為發展方向。六國俾人個感覺算喺幾低調,唔似一啲大酒店搞咁多花臣嘢,比較實務,就連做自助餐都一樣咁平實,價錢平,質老實。其實佢個位置幾好,晌告士打道稅務大樓斜對面,距灣仔地鐵站才5-10分鐘步程,非常方便,可以話靜中帶旺。
六國基本上有3間食肆,包括位處酒店大堂嘅大堂酒廊,休閒舒適嘅格調,三幾個老友飲飲酒嘅好hea處;另外,於酒店一樓嘅粵軒,裝潢富東方色彩,古意盎然,提供嘅精緻粵菜喺款客好選擇;至於今回獲公關邀請試菜嘅喺同於一樓,粵軒對面嘅Le Menu,環境清逸,餐廳內兩盞金光閃閃巨型大吊燈,含蓄咁綻放幾分氣派,最鐘意當然喺靠向告士打道一排落地玻璃窗位,餐廳樓底本身頗高,加埋窗外景致,感覺更開揚。而Le Menu主打喺商務午餐、自助午餐及自助晚餐,當然,仲有下午茶嘅甜餅套餐或輕食套餐供應。
經過今次晌Le Menu用餐後,不難發現佢個自助晚餐喺勁超值。當城中好多自助晚餐已去到四、五百一位嘅時候,佢哋仲喺賣緊$258成人 / $198小童(一至四)、$278 / $218(五)、$288 / $228(六、日)嘅懷舊價,晌旺區咁嘅價已經喺好平,仲要唔收加一添,服未?不過,咁樣只可以叫喺超抵囉。超值?計埋食咩嘢先可以叫得喺唔喺超值,雖然小弟喺獲邀嚟試食,但因為食自助餐關係,跟所有食客食嘅嘢都喺一樣,唔會我夾嗰舊正過你嗰舊啩,依家就開始等小弟介紹一吓今晚我嘅超值美食之旅啦!

bowl海鮮
收咁實惠嘅價錢就唔會衝著海鮮而來,但喺,3款冰鎮海鮮一樣唔失禮,有凍甜蝦、翡翠螺、淡水小龍蝦,源源不絕咁供應。今期嫌麻煩,兩款蝦都無食,只有試咗翡翠螺,味道唔錯,幾有鹹鮮味,我一向都鍾意將海鮮拼沙律食,可以互相提味嘛。
bowl冷盤
冷盤又有3盆,不過就唔止有3樣,包括:薄切肉腸拼盤、煙三文魚、醃餃魚、煙鴨胸、火雞腿等等,小弟揀咗煙三文魚、醃餃魚、沙樂美腸配沙律一齊食,「油潤」搭「鹹香」拼「清爽」,好正架!
bowl沙律
晌海鮮及冷盤周邊,就放有沙律吧材料,一大盆沙律菜做膽,兩旁喺橄欖、水瓜柳、蕃茄乾、洋蔥、煙肉碎、芝士粉、泰國露筍、車厘茄、紅腰豆……等等,及5款醬汁(凱撒汁、芝麻汁、柚子汁、千島汁、咯嗲汁),沙律吧材料雖然唔算咩特別,但絕對可以拼湊出心水開胃沙律。小弟就鍾意樣樣材料加啲,再配埋部份海鮮同冷盤嘢,添啲柚子汁作為揭幕戰嘅「第一道菜」,開開胃醒醒神。
如果唔想左拼右砌,店家有3款預製好嘅沙律:粟米火腿蛋沙律、泰式金邊粉沙律、南瓜海鮮沙律,以後者用料最豐富及有睇頭,值得一試。

bowl和食
刺身大體上都喺自助餐嘅熱門嘢,Le Menu都會照顧吓鍾意食日本嘢嘅客人,除即點即切嘅三文魚、吞拿魚、八爪魚外,又有5、6款什錦壽司、壽司卷,同埋日式小碟:火炙三文魚甜蝦、醬油鯖魚豆腐,以及小杯裝冷麵。刺身唔錯,三文魚頗油甘;壽司、壽司卷較為普通,大可不試;兩款日式小碟的的骰骰,以鯖魚豆腐較得小弟歡心,味道一濃一淡挺特別喎。
bowl餐湯
照大多數自助餐嘅慣例,Le Menu一樣有提供一中一西嘅餐湯,分別喺磨菇忌廉湯同青紅蘿蔔煲豬展,兩款都有試,前者味道OK只喺稀咗啲,反而後者甚有老火湯嘅感覺。湯盆後有一籃子麵包,大致都有4、5款,揀咗其中3款(法包、意大利蕃茄包、意大利香草包)搽牛油配西湯,用上銀寶牛油(Lurpak),有誠意,麵包軟熟,如果喺暖暖哋就仲好。旁邊食友講笑咁話不愧為「山區麵包王」喎,食咁多包,哈哈,虛銜一個啫!
bowl熱盤
因為場地所限,熱盤可擺嘅數量只有10盆,不過俗語有話「將勤補拙」,雖然未必形容得好啱,但見師傅久唔久都有轉款,所以熱盤款式不下10款。先後出咗去幾輪「巡視」,發覺熱盤都可以講得上貴精不貴多喎,依晚較搶手有蝦膠釀海參、炸蝦丸、中式蒸海斑、蒜茸蒸蟶子,搶手自因食材較貴價,後者兩款海鮮都好鮮味,蒸得恰到好處;而燒豬肋骨BBQ汁、忌廉汁焗青口、燒羊架喺今晚至愛,一來賣相唔錯,二來味道真喺幾得,尤其個豬肋骨同羊架,味濃肉香,肉質又鬆軟;其他仲有紅酒燴牛肉、葡國雞、白汁煎焗魚柳、燒汁煙豬柳、炆鴨、中式燒味(燒鵝、白切雞)、清炒時蔬,樣樣都喺淺嚐;而墊肚用嘅白汁三文魚意粉同揚州炒飯,就無沾手喇,因為平時食自助餐都喺同老婆一齊,今晚得一支公,太飽肚嘢就唔敢多食,上面一口氣食幾片包都已經大膽咗啲架啦,小弟仲要留肚大戰甜品嘛!
燒豬肋骨BBQ
忌廉汁焗青口
燒羊架
bowl烤肉
大多數自助餐嘅烤肉車不外乎一、兩款烤肉,晌Le Menu喺增值版,除燒西冷外,仲有德國牛仔腸、雞肉腸同烤蔬菜,旁邊仲加插紅外線燒烤爐做嘅烤魚柳,我見有啲食家寫仲有烤蒜蓉牛油大蝦添,小弟遲去就應該走咗寶,之後又無見佢再出,真可惜。不過,燒西冷質素做得一啲唔差,內裡粉嫩多汁,肉味夠濃;兩款腸亦幾好食,腸衣卜卜脆,又無一般過鹹嘅情況,唔好見啲腸好大條,查實好似啲西冷咁,可以要求切少少嚟試,份量隨心所欲;烤蔬菜比起熱盤嘅清炒時蔬惹味香口好多;烤魚柳表面煎得焦香,口感亦幾肥美,第一次見識依款紅外線燒烤爐,又幾神奇喎,煎烤起上嚟又無過大油煙添。
bowl即煮粉麵檔
檔口幾大,皆因擺咗唔少材料,有幼麵、油麵、河粉可揀,餸料就包括菇菌、魷魚、牛柏葉、豆卜、芝士腸、鮮蝦、雞肉、鯇魚片、炸魚片、丸類、生菜、菜芯、銀芽,都幾豐富。晌生麵旁有啲蒸籠仔,就喺以蒸籠仔揀啱你嘅心水麵條同材料,再交俾師傅煮,攞番個號碼牌轉頭再去拎,到時先再揀湯底(清湯、豬骨湯、喇沙湯)。原本無打算食粉麵,小弟只喺一心想試佢個喇沙湯底,即管整一碗嚟試吓,少少河粉,加菇菌、鮮蝦、魚片加喇沙湯,再撒少少蝦乾碎就成一碗自家配嘅海鮮喇沙湯河,湯底幾正,濃郁夠香,帶些少辣,鮮蝦同魚片又新鮮,如果唔喺為咗留肚俾甜品,都心思思想整多碗架!
bowl甜品
甜品位晌一入門口左右,左邊有部爆谷機同即製班戟,右邊一列放有大大小小唔同款式嘅甜品,雖然望落未喺好震撼,但數吓為數都有成十多廿款,除數款大餅之外,好多都做得的骰小巧。一口氣為各位介紹吓有咩甜品先(因為唔喺款款甜品有名牌,以下所提嘅名由小弟自行演繹),朱古力心太軟、焗牛油麵包布甸、忌廉泡芙、朱古力慕絲蛋糕、紐約芝士餅、芒果慕絲蛋糕、木糠布甸、法式焦糖燉蛋、藍莓芝士餅、黑森林蛋糕、班尼士、綠茶慕絲、迷你什果撻、雜莓慕絲果凍、芒果布甸、朱古力噴泉、自製格仔餅及Häagen-Dazs雪糕,喺咪睇番個陣容覺得頗吸引呢!
小弟自覺今晚都算有啲狼死,食咗成3碟自家製甜品拼盤,食完實在超飽超滿足,所以隔離另一位食友本打算留番件格仔餅俾小弟,好抱歉,夠晒皮喇。整體而言,以小弟準則,甜品款式屬大路嘢,而水準屬中上,雖未有咩驚喜,但絕對不俗,以下幾款喺心水推介:
bowl朱古力心太軟 - 朱古力味濃郁,內裡蛋糕部份帶點濕潤,最好一出就食,因為擺耐咗嘅心太軟除攤凍之外,流心效果大打折扣。
bowl朱古力慕絲蛋糕 - 朱古力味不俗,慕絲做得挺柔滑,口感輕盈。
bowl芒果慕絲蛋糕 - 慕絲嘅芒果味香甜,而蛋糕面上嘅芒果肉夠晒熟透。
bowl法式焦糖燉蛋 – 蛋香與雲呢拿香混集其中,面層焦糖做得夠薄夠脆。
bowl美式芝士餅 - 芝士味甚重,用料十足,質感柔軟,只喺消化餅底做得有啲厚。
bowlHD雪糕 – 竟然有成4款口味:士多啤梨、椰子軟心、曲奇脆餅、流心法式燉蛋,仲要喺較少食到嘅添,加啲朱古力漿,正呀!4款試勻,個人最鍾意椰子軟心、流心法式燉蛋,味道香濃,質感軟滑。怕蝕底嘅人大可食多幾球,實屬回本之選,哈哈!
bowl餐飲
所以橙汁、什果賓治、青檸綠茶、咖啡、紅茶(檸檬片在旁,沖檸茶、檸水都可以啦)全部任斟任飲,咖啡更喺以咖啡機即磨即沖,品質有番咁上下。比起一啲收得你貴,只包一杯餐飲嘅餐廳,Le Menu就來得大方無所謂。見餐枱面仲有啲每月紅酒、白酒嘅推介,每杯收$40,如果人多大可點一枝共享,都喺$200。
城中賣$300樓下嘅自助晚餐唔喺無,有質有量,仲要交通方便嘅真喺唔多囉!Le Menu除咗環境唔錯,感覺寬敞外,服務亦值得一讚,收碟斟茶遞水勤快,食物補充又足,差啲忘記一點,自助餐時間由6:30pm去到10:00pm,算少有去到咁夜,跟公關傾開,10:00pm後客人都仲可以坐多陣,基本上唔會趕你走,可以讓你同朋友慢慢傾,不過阻人收工就無謂啦,我哋依啲打工仔嘅一夠鐘就想閃啦。

遲吓情人節就到,出面稍有名氣嘅酒店做緊嘅自助餐差唔多成千大洋一位,唔喺個個咁大富大貴,Le Menu所推出嘅「浪漫燭光情人節自助晚餐」,相對就相宜好多,成人$468 + 10%,除加送情人節特飲,仲有情人節朱古力收添,當然菜式嘅矜貴度會比平時嘅更高啦。上文都講過,六國今年喺80周年,稍後將會有一連串誌慶活動,令人期待呀!晌度再次多謝Le Menu各單位細心嘅款待。

個人評分
味道:9/10
環境:7/10
服務:8/10
抵食:8/10
平均每人消費:HK$0(試食活動)
餐廳資料:

Le Menu
灣仔告士打道72號六國酒店1樓
2866 3808

沒有留言:

發佈留言