2013年1月26日星期六

鳳城酒家:團年飯之真喺好Duck

團年飯嘅第二激,就喺跟教會嘅細胞小組飯聚,因為牽涉多個家庭,所以約期都搞咗幾耐,但都就到個星期六晚,雖然仲差幾個組員,但有成10大4細加個手抱B仔,一共15人齊濟濟一堂,頗為熱鬧呀!
第二朝要返主日,啲細路又話要返主日學,所以又喺要揀番啲大家就腳嘅地方。加上年近歲晚,又喺星期六,間間都分兩個時段,連舊年食過嘅京華都一樣,第一輪早得滯,小朋友啲興趣班未放人,第二輪又晏得滯,食完都可能要成10:00有多。搵咗好耐,卒之搵到太子鳳城,唔喺因為佢喺米芝蓮一星,而喺佢竟然無分時段。不過,依個喺假象,之前已好擔心咁問清楚,到時喺咪有位無問題?唔會有時限嗎?點知,訂位就訂咗7:30pm,小弟負責搞,都已經早幾個字到,結果8:00pm先有枱俾我哋,足足等咗成45min。去過依間鳳城嘅人都知,佢哋門口窄,樓梯通道又窄,加埋其他等位客,好似一家幾口逼晌個數十呎板間房。雖然負責個阿姐已經好努力去安排入座,又解釋3樓今晚有包場,但如果你承擔唔到咁多客喺咪一喺分場,一喺就接少啲客。我哋大人都無乜所謂,喺怕啲小朋友啫。幸好,大家都肯忍耐吓,幾個媽咪、嗲哋講吓湊仔經,又陪啲細路玩吓,總算消磨到!
有幾款套餐「良朋套餐」($1,180,7-8位用)、「超值套餐」($1,880,9-10位用)、「特價套餐」($2,480,12位用),另收茶芥加一,價位都OK,只喺菜式唔太啱心水,都喺散叫合心意啲。

對上一次晌依間鳳城食已經喺2008年初嘅事,其實嗰次印象麻麻,今次再嚟,枱櫈依然喺咁逼,人手依然喺唔多夠,服務依然喺麻麻哋,但今次所點嘅食物大家都食得津津有味,好啱胃口,尤其個梅子焗米鴨,真喺好duck。
鍋貼大明蝦 $140
嚟鳳城點依道菜都算喺指定動作,一客12件(例牌),侍應話可以按人頭再加,不過有啲細路唔食得炸嘢,所以照要一個例牌都可以喇。大蝦去穀挑晒腸起雙飛,夾住一小炷蕃茜,跟白麵包炸成蝦多士。件蝦多士本身已經唔算油,但蘸點喼汁,油膩感就更輕,多士底非常脆,而大明蝦肉質爽甜、蝦味鮮,正!
鳳城炸粉果 $68(每打)
鍋貼大明蝦都當喺道前菜小食,唔多好送飯,跟住再嚟亦都喺一樣,當前菜小食嘅鳳城炸粉果,依道菜又喺鳳城另一特色嘢。賣$68一打幾抵食,粉果餡料不賴,有蝦肉、冬菇、豬肉……等等,淨食已經唔錯,小弟個人食法喺要快浸一浸個湯,去油膩喺其次,令個炸粉果變得軟糯,但咬嗰吓先有點脆脆,慢慢又嗒到上湯甜味,最後就軟軟糯糯。
香煎蓮藕餅 $80
藕餅在於事前功夫,打蓮藕,搓豬肉,都要時間心機。蓮藕餅煎得非常香脆,藕味都幾突出,而質感有咬口又唔鬆散,好食!
上湯灼芥菜胆 $80
晌張菜單上,樣樣嘢都有標價,但唯獨蔬菜類就無,只列低一堆菜名:豆苗、菜心、芥蘭、西蘭花……。煮法由你決定,又或問吓經理意見,依碟上湯灼芥菜胆就喺阿經理建議個煮法。芥菜胆經上湯灼過好鮮甜,帶點點爽口,唔點蠔油都OK。
蒜蓉豆豉炒油麥菜 $70
另一道蔬菜菜式就揀個惹味啲嘅,蒜蓉豆豉炒夠晒香口惹味,而且啲炒菜夠鑊氣,送飯良伴。
生劏大海斑二食 $328,喺「是日介紹」之一,有斑球,又有炆頭腩,都食得過嘅推介,就要一份,一餐飯要有菜、有肉、有魚先夠平均嘅。

家鄉炒斑球
一啲都唔斑球呀,大大件嘅斑塊,無骨啱晒啲細路食,肉質又炒得好鮮嫩,魚味濃,不愧為大海斑。仲有芹菜、蜜糖豆、木耳,幾款都喺口感爽脆嘅配菜,所以整道菜有嫩有爽,好穩妥嘅一道魚類菜式。
枝竹炆頭腩
相對炒斑球,炆頭腩就濃香好多,頭腩份量亦唔少,而且炆過特別入味,充滿磨豉香。此外,墊有枝竹及冬菇,索滿汁,又喺好食。
脆皮炸子雞 $240(半隻$120)
炸子雞屬鳳城名菜,唔少客會點,伴有一小件檸檬壓汁加添炸子雞芳香,亦喺依度特色。老套一句,真喺皮脆肉滑,外皮確喺甘金鬆脆,油脂唔多,雞肉嫩滑入味,喼汁淮鹽都可以唔使點,帶少少檸檬芳香,果然別饒風味!
梅子焗米鴨 $360
焗米鴨喺需預訂嘅菜式,亦唔似炸子雞有半隻買,所以我哋成圍枱,當然預訂一隻啦,結果個米鴨不負眾望。雖然唔知個焗米鴨點整,睇落應該無八寶鴨呀、玉簪田雞腿呀……咁複雜,但就真喺唔訂無得食。米鴨鴨肉好鬆化,又軟又腍,而且滲出濃濃梅子香,酸味得嚟啱啱好,唔會太過火,連底下啲梅子汁撈飯亦正,酸甜有肉羶香。
大良炒鮮奶 $88
等咗好耐都未見個大良炒鮮奶,仲以為漏單,總之就千呼萬喚始出來。不過,成晚所有菜式,以依個炒鮮奶似乎有啲失準。奶炒得唔喺好滑,而且有少少怪味,所以大家試咗啲都無再夾喇。
蓮蓉西米焗布甸 $88
焗布甸喺今晚另一個要預訂嘅菜式,亦喺鳳城名物,分細$68、大$88、加大$120,唔知點因算個份量,叫侍應安排就得喇。我哋10多個人,叫個大都已經OK,1人1小碗。布甸捧出嚟仲喺熱氣騰騰,新鮮出爐咁,焗得個面面有微焦,好靚。面層喺蛋漿同西米,底下喺白蓮蓉,既清香又軟滑,無過甜嘅毛病,超正!
凍椰汁紅豆糕 $14 / 3件
我哋當中都有好幾個組員都鍾意食甜品,所以,既然個凍椰汁紅豆糕賣咁平,又點可以唔叫呀,仲一次過叫4客,盡量人人都試多少少。由於切割擺位問題,其實每件糕都有幾多紅豆,紅豆大粒清甜,而椰汁糕部份,亦好濃椰汁味,質感亦唔會太削。
嘩,飯後一熱一凍甜品作結,相信大家都好滿意今晚餐團年飯喇!埋單都喺$2,200,淨喺計番我哋10個大人,每人都喺$220,食到咁有質素菜式,都幾值呀!當然,訂咗枱都可能要等好耐,環境非常擠擁,嚟食就要有少少以上心理準備。

個人評分
味道:9/10
環境:5/10
服務:4/10
抵食:8/10
平均每人消費:HK$220

餐廳資料:
鳳城酒家 Fung Shing Restaurant
太子彌敦道749號歐亞銀行大廈1-2樓
2381 5261

沒有留言:

發佈留言