山區裡的走走趯趯: Arome Bakery Room東海堂：薯不簡單

2013年1月9日星期三

Arome Bakery Room東海堂：薯不簡單

又嚟一條是非題，究竟「Arome Bakery」同「Arome Bakery Room」有無分別？咁問得，就梗喺有啦，其實佢哋中文店名都就咁叫番「東海堂」，不過英文店名就有分別，前者就喺平時晌港鐵、大部份街鋪見到嘅東海堂，賣麵包、凍餅、卷蛋、蛋糕；後者除咗有一般東海堂嘅產品以外，路線會走得較高檔次，多賣咗一啲法式、較精緻嘅泡芙（puff）、泡芙條（eclair）、切餅（slice cake）及甜品蛋糕（petite dessert）。而最煞食喺有即場新鮮製作產品，如人氣嘅法式拿破崙、新鮮出爐嘅北海道3.6牛乳蛋白撻，所以為設置廚房、大型焗爐，佢哋比一般嘅東海堂店舖都大得多，而且裝修亦花咗點功夫，墨綠色瓷磚，數幅麵包、甜品水彩畫，感覺更休閒。從佢張產品簡介所知，暫時高級版東海堂晌全港都喺得7間，算遍佈港九新界！

早前聖誕試咗東海堂個雜莓芝士慕絲cake little，及後又見到幾多食友讚Arome Bakery Room嘅出品，既然小弟晌中環工作，行過嚟金鐘都好方便，所以就一於揀幾款心水返去跟家人作飯後甜品先。鋪前兩組餅櫃，放有廿多三十款甜品，簡直琳瑯滿目，最吸引我故然喺一列賣相較精巧嘅切餅及甜品蛋糕啦。其實除麵包、甜品、蛋糕，佢都仲有啲凍飲、沙律、米蘭包（特色熱狗三文治包）供應，話樓上就有幾幢商廈，唔少人買嚟當午餐。

餅櫃1，仲有啲凍飲、沙律、米蘭包供應。

新鮮出爐嘅北海道3.6牛乳蛋白撻，$7件咋！

餅櫃2，兩組餅櫃，放有廿多三十款甜品。

雖然話依間喺東海堂嘅高級版，不過相比起一啲甜品店，動輒一件餅賣到四十蚊左右一件，佢啲切餅及甜品蛋糕價錢算親民，標價都喺$20-$28，確喺抵試。因此，原本打算要4件，一人一件嘛，結果就執夠半打，剛好填滿整個餅盒，哈哈！

包裝盒設計簡潔

宇治玉露紅豆蛋糕 $26
依件專燈揀俾老婆，因為佢喺紅豆「粉絲」，不過返到屋企大家樣樣都想試，結果件件一開四。一共4層，由下而上有朱古力海綿蛋糕、綠茶慕絲、再一層朱古力海綿蛋糕及輕怡芝士慕絲，面頭放幾粒綠茶方脆，原個買要$188，依家$26一件就可以試到佢嘅真味。宇治玉露喺最高級嘅綠茶，姑勿論依件餅喺咪用到宇治玉露，但綠茶味幽香得嚟唔俗，只恨慕絲中嘅紅豆很少，而綠茶方脆食落鬆化。

開心果榛子脆米蛋糕 $26
相比起上面嘅宇治玉露紅豆蛋糕，依件開心果榛子脆米蛋糕個賣相就非常巧手，頭尾一抹忌廉泡泡，中間則放咗開心果同榛子，餅面嘅裝飾，絕對喺手工嘢。下層喺脆米蛋糕底，食落「咯咯聲」；中層應該喺朱古力「ganache」，喺一種以忌廉加朱古力做成、濃郁且挺身嘅朱古力夾層，配合脆米蛋糕底好有實質感；而上層喺綠色嘅開心果慕絲，頗幼滑，好有心思嘅作品！

黑加侖子紅莓慕絲切餅 $28（新產品）
喺依期嘅新產品，加上色彩艷麗，當然要一試啦。底層同上述嘅開心果榛子脆米蛋糕一樣，勻以朱古力夾層配脆米蛋糕底，而上層紅色嘅慕絲就改為新鮮黑加侖子同紅莓打造，同樣口感柔滑，內裡仲有少少紅莓粒粒果肉，餅面塗上一朕鏡面朱古力漿，不單中和一下慕絲嘅酸度，更令整件餅酸甜有層次。至於一粒紅莓、一片半月形白朱古力薄片及一粒藍莓作餅面裝飾，頓時更有立體感，$28實在抵食。

藍莓紅桑子三重奏 $22
店員推介咗三重奏（trio）系列，據講喺法國里昂嘅經典法式甜品，不過由日本客席顧問餅師郷知詠子女士再重新演繹，選用日本高級麵粉、即日手做吉士忌廉、原條馬達加斯加雲呢拿條……等等高質食材製作，講到咁，心郁要試一試。一共有3款：藍莓紅桑子、柑柚、雲呢拿芒果，當日只有前兩者供應，小弟揀咗藍莓紅桑子，老實講，外型就唔太討好，味道方面又如何？中間嘅紅桑子吉士忌廉唔錯，濃郁嘅莓香，質感軟滑，不過外層嘅「泡芙」皮會有點乾及粗獷感，其實店員都有說明過，佢話因為所有材料都來自天然成份，一啲化學添加都無，做出嚟效果較原始，所以小弟又想即管試下咁，但對於咀刁嘅港人，相信唔喺個個都啱食啫。

焦糖慕絲朱古力脆脆蛋糕 $24（新產品）
唔理佢喺唔喺新產品，睇見「焦糖」兩個字小弟心想就已經喺「食硬佢」。圓柱外型，一身漆黑，夠晒型格。因為成個都被朱古力軟漿包實，切開先見到真身，內裡層次複雜，朱古力脆米蛋糕底、ganache朱古力層、焦糖慕絲、朱古力慕絲、外層朱古力軟漿，面面仲有啲朱古力薄脆，唔使多講，一食你就知，正！皆因朱古力香濃，雖然焦糖味唔突出，但配合其他夾層，口感多變，另一歡心之選。

鹿兒島紫薯蛋糕 $24
見好多食友都推介，多少都衝著佢而嚟，雖然外貌唧成毛冷造形，不過小弟唔覺有咩特別，因為一般粟子蛋糕都喺咁整。反而好奇啲鹿兒島紫薯薯味有幾強勁，打直切開件蛋糕，原來唔止面層鋪上紫薯蓉，蛋糕心亦有，餅底上下都有，薯味的確突出，兼且做得挺軟滑，難得甜度適中。更驚喜嘅喺蛋糕心除紫薯蓉，仲加入咗蘋果粒同忌廉，幾嶄新嘅配搭。唔知改以「雞蛋黃」蕃薯打蓉，襯以薑汁加入忌廉同打，做成港式薑汁蕃薯蛋糕又會點？至於蛋糕底有別以上幾款切餅及甜品蛋糕，口感較濕潤同腍身。