必勝客 Pizza Hut：免費好風光

特色嘅薄餅店晌香港可謂不知幾多，所以近年必勝客都少咗幫襯，要幫襯通常都喺搞吓大食會時嘅好幫手，仲要多數喺搵同集團嘅PHD外賣速遞添。不過，有次就喺請晒啲表姪仔、表姪女食必勝客，索性買咗$500現金券當入會，$500現金券當然即場用嚟找數，入咗會多少有啲優惠，最有用又實際算喺張「夏威夷風光」（細批）贈食券，趁到期前，梗要「嗱嗱淋」用埋先啦。

捉埋老婆一齊嚟荔枝角依間必勝客食晚餐，乘機等佢煮少餐，食完仲可以順路過隔離吉之島逛吓（依家都應該改口叫Aeon咯）。兩口子，已有一個細批墊底，所以我哋只喺點多一個酥皮湯及一客沙律就算，免得食唔晒。環境唔多講，舊年晌度寫過一篇食晏嘅，有相睇知佢個場喺點，反而服務就好過上次，無咁多「騎尼」事。

酥皮海鮮湯 $52
個酥皮湯唔知整定咗幾耐，因為送到嚟個酥皮已經塌晒，少咗份可觀性，亦因為塌晒，所以一「篤」酥皮就會浸落啲湯度，可以食到酥皮最鬆脆嘅頂位就無晒，有啲嘥料。酥皮浸湯嚟食，當好似牛脷酥浸白粥，志在飽肚啲。講番個海鮮湯，查實用料都唔慳，幾多料吓，有蝦、魷魚、帶子粒等等，撈極都有咁，橙紅色嘅雜菜雞湯，都幾濃郁，帶少少酸，估計加咗啲鮮蕃茄，又可令色澤好睇啲。

挪威三文魚雜果沙律 $68
有羅馬生菜墊底，加埋啲雜果沙律，仲有士多啤梨、車厘茄、藍莓粒襯襯色，面頭一大箸挪威煙三文魚，屬大堆頭之作。雜果沙律較港式，沙律醬撈生果而矣，不過就勾起以前必勝客嘅自助沙律吧，真喺幾好玩架，心態唔在乎點配搭先好食，在乎砌得高砌得叻。煙三文魚大片又落得多，真喺無欺場，記得晌超市見最平嘅都成三十幾蚊一包，都喺得嗰100g咋！如何啲羅馬生菜預先以少少油醋撈一撈，相信整個沙律會更好多食，因為啲生菜食起嚟好寡。

夏威夷風光 $99
雖然話免費，但堂食都要補番$9.9服務費，可以講喺無可厚非，只喺有啲啲小家嘅感覺啫。「夏威夷風光」，餡料只有菠蘿、火腿、芝士，簡簡單單，無話免費就將貨就價。厚批麵包式口感，茄醬底加厚厚芝士，一貫必勝客水準，即喺無驚喜，又唔會太差，做到好「機械式」生產，好少食到佢有咩差錯。老婆只喺食咗兩件就見飽，為免打包嘥多個袋，小弟包底，哈哈，所以食得我好鬼飽。

行完吉之島，仲喺肚漲漲，索性由荔枝角行番去美孚，當散步做運動，幫助吓消化囉！題外話，成張單原價應該收$240，扣除個免費薄餅，實收$130。

個人評分
味道：6/10
環境：8/10
服務：7/10
抵食：7/10
平均每人消費：HK$65

餐廳資料：
必勝客 Pizza Hut
荔枝角深盛路9號宇晴匯2樓89-90號舖
2264 9119