Deli and Wine：鮮蝦先賣

老婆加班，當然懶煮出街食，醒起手上仲有啲用信用卡積分換嘅美心集團現金券，當然盡快用，唔使記掛晌心，萬一過咗期就唔抵啦！因為啲現金券又唔喺好多錢，近期去多咗美快MX食早餐同下午茶，唔多想連晚飯都幫襯佢，想起集團旗下晌文化中心嘅Deli and Wine，一直都有想去試嘅意思，因為好評持續高企，但總喺遺忘咗，今晚就下定決心一試多人稱讚嘅「常餐」。

Deli and Wine位處地點好，所以依晚（閒日）所見仍然十分旺場，雖然未使要等位，但一枱人走又一枱客接住嚟。鋪外、鋪內都甚有歐陸小店味道，內裡佈置彷如家居個室，牆上嘅小掛畫、枱上壁上嘅小盆栽、梳化椅後嘅英文小說，都令人感到歐洲人對食擁有一份閒情。不過，依度以半自助形式購買食物，如經廚房烹煮嘅食物，則由侍應送上，客人大可安心等待。
整間餐廳大致上分咗三個區域，第一個區域就喺入門口靠右直入，稍稍隱身餐廳後方，有點點似後花園，因為一邊全喺落地玻璃窗，日頭可以透盡日光；第二個區域，正正入門口左邊，對於收銀櫃枱，除沿牆邊幾組梳化外，最特別喺中間有一張長長大木枱，可坐到12人之多，大可幻想吓置身晌歐洲人家內嘅大飯廳，此外，這個區域正正對著開放式廚房，可以睇到部份食物嘅製作；第三個區域，過咗個「飯廳」再入，餐廳嘅最左方，放咗好多張小圓枱，架咗好多大盆栽，配合柔和燈光，感覺唔錯！

第一區域

第二區域

第三區域

餐牌大大個嵌晌收銀機傍，有湯麵、撈麵、意粉、漢堡、咖喱、飯類…等等，另有咖啡、紅茶可供選擇。其實，晌門口及收銀機位，亦已有圖文並茂嘅餐牌；另一邊廂有個凍櫃，放滿礦泉水、啤酒、汽水、果汁、沙律、三文治、生果杯…等等。因為選擇不少，排隊時好諗定食咩喇！

另一邊廂嘅凍櫃，放滿多款自取食品、飲品！

放晌收銀機位嘅餐牌，可以細心再睇。

常餐（Daily Set） $44
常餐包咗炒蛋火腿伴牛油多士、叉燒湯意粉，再配啡茶或汽水，喺店內人氣之選，賣到成$44一客，自然有佢貴嘅道理，亦唔應該隨便跟平時晌茶記賣廿零蚊嘅常餐相比。炒蛋好到家，炒得滑嫩兼帶少少蛋漿，又唔會有好生嘅感覺，超正，睇相都可以感受到幾分；而牛油厚多士烘得鬆脆，牛油甘香，將少少炒蛋加埋火腿、牛油厚多，實在好味。叉燒湯意粉，湯頭無咩話好特別，意粉亦做到基本，但估唔到叉燒頗有水準啫，叉燒燒得鬆化香口，又有啲燶位，零脂肪就好老婆口味。加埋餐後一杯鮮奶咖啡，咖啡香氣嘅縈繞，口感嘅細滑香濃，很滿足嘅享受！

鮮蝦咖喱配白飯（Fresh Prawns Curry） $62
咖喱應該喺馬來咖喱嚟，因為無印度咖喱咁多重香料味，又無日式咖喱嗰種帶果香嘅味，主要就喺椰奶香味，以及質感較濃厚，加上又見佢加咗少少蝦米碎，較富東南亞色彩。既然叫鮮蝦咖喱，蝦自然喺另一主角，「鮮蝦」絕對貨真價實，蝦隻本身已經夠晒大粒啦，仲要好有蝦鮮味，又爽彈。唯一喺配角嘅演繹有啲失色，咖喱仲有啲菠蘿同幾粒薯仔，失色地方就喺啲薯仔未夠熟透，有啲實心，否則加埋賣相精簡，飯粒又分明有米香，絕對可以有90分以上啦。

雖然老婆要加班，但食番餐好嘅，總會令人心情愉快多一點！Deli and Wine，環境舒適，食物有質素，又唔收加一，值得再嚟。

個人評分
味道：8/10
環境：8/10
服務：8/10
抵食：8/10
平均每人消費：HK$53

餐廳資料：
Deli and Wine
尖沙咀梳士巴利道10號香港文化中心餐廳大樓地下
2721 9866